ՀԷՑ-ի վարկային պարտավորությունները սակագնով չեն սպասարկվում. Ռոբերտ Նազարյան

Հայաստանի էլեկտրական ցանցերի վարկային պարտավորությունները երբեք չեն սպասարկվել էլեկտրաէներգիայի սակագնով: Այս մասին Ազգային ժողովում էլեկտրաէներգիայի սակագնի թանկացման վերաբերյալ խորհրդարանական լսումների ժամանակ ասաց ՀԾԿՀ նախագահ Ռոբերտ Նազարյանը՝ պատասխանելով ԲՀԿ խմբակցության պատգամավոր Ստեփան Մարգարյանի հարցին, թե ինչու քաղաքացին պետք է սպասարկի էլեկտրաէներգետիկ համակարգի ընկերությունների վարկային պարտավորությունները կամ հետագայում այդ ընկերություններն այդ գումարները վերադարձնելո՞ւ են, քանի որ ստացվում է, որ նրանք իրենց վարկերը փակելու համար պարտք են վերցնում սպառողից: «Երբեք սակագնով չեն սպասարկվում Հայաստանի էկեկտրական ցաների վարկային պարտավորությունները: Մեզ չի հետաքրքրում՝ նրանք վարկ կվերցնեն, ինչ պայմաններով կվերցնեն, քանի որ առք ու վաճառքի պայմանագրի մեջ մենք հստակ ամրագրել ենք, որ նրանք պետք է վերցնեն այնպիսի վարկեր, որոնք կլինեն իրենց շահութաբերության նորմայի սահմաններում, որովհետև եթե վերցնեն վարկեր, որոնք կլինեն նրանց շահութաբերության նորմայից դուրս, ապա կարող է շատ ծանր վիճակում հայտնվել»,- ասաց Նազարյանը:

Միևնույն ժամանակ նա նշեց, որ էլեկտրաէներգիայի սակագնով իրենք սպասարկել են ջերմաէլեկտրակայանների վարկային պարտավորությունները, քանի որ դրանք շահութաբերության նորմա չունեն, արդիականացման համար արտոնյալ վարկեր են վերցնում, որոնց ժամկետները սպառվում են և անհրաժեշտ քայլեր է պետք ձեռնարկել ֆինանսական կայունություն ապահովելու համար:

Ռոբերտ Նազարյանը նշեց, որ սակագնի թանկացման պատճառներից մեկն այն է, որ ատոմակայանն այս տարի 88 օր ուշ է գործարկվել, ինչի արդյունքում իրենք ստիպված են եղել էլեկտրաէներգիա վերցնել Հրազադան ՋԵԿ-ից:

ԱԺ ՀՀԿ խմբակցության պատգամավոր Հովհաննես Սահակյանը հետաքրքվեց, թե ինչո՞ւ էլեկտրաէներգիան չեն վերցրել Երևան ՋԵԿ-ից, որտեղ գներն ավելի մատչելի են: «Ինչո՞ւ ավելի մատչելի գներով էլեկտրաէներգիա չեք վերցրել Երևան ՋԵԿ-ից, ինչի արդյունքում հիմա մենք կարող էինք խուսափել այս թանկացումից»,- հարցրեց Սահակյանը:

Ի պատասխան Ռոբերտ Նազարյանը նշեց, որ Երևան ՋԵԿ-ում գներն ավելի մատչելի են, սակայն այն աշխատել է իր ամբողջ ուժով և ռեզերվ չի ունեցել, որպեսզի կարողանար բավարարել անհրաժեշտ պահանջները: «Իսկ Հրազդան ՋԵԿ-ը այնքան ռեզերվ ունի, որ անհրաժեշտության դեպքում կարող է բավարարել ամբողջ հանրապետության պահանջը: Ահա, թե որն է պատճառը, որ էլեկտրաէներգիա վերցրել են Հրազդան ՋԵԿ-ից»,- ասաց Նազարյանը:

Ռոբերտ Նազարյանը նշեց նաև, որ էլեկտրաէներգետիկ համակարգի ընկերությունների ֆինանսական խնդիրների պատճառներից մեկը նաև սակավաջուր տարին է: