Ռոբերտ Նազարյանն էներգախնայողությունը կարևոր խնդիր է համարում Հայաստանի համար

Հայաստանի նման փոքր և էներգետիկ ռեսուրսների խնդիր ունեցող երկրների համար շատ կարևոր է էներգախնայողությունը: Այս մասին Ազգային ժողովում էլեկտրաէներգիայի սակագնի թանկացման վերաբերյալ խորհրդարանական լսումների ժամանակ ասաց Հանրային ծառայությունները կարգավորող հանձնաժողովի նախագահ Ռոբերտ Նազարյանը` պատասխանելով ՀՀԿ խմբակցության պատգամավոր Խոսրով Հարությունյանի հարցին, թե ժամանակը չէ՞ արդյոք ավելի շատ ուշադրություն հատկացնել էներգախնայողությանը: «Այո, մենք իսկապես կարևորում ենք էներգախնայողությունը, և ես կարող եմ ասել, որ 21-րդ դարում դա կարևորագույն խնդիր է ցանկացած երկրի համար, հատկապես Հայաստանի նման երկրների համար, որոնք էներգետիկ ռեսուրսների խնդիր ունեն»,- ասաց Նազարյանը:

Ռոբերտ Նազարյանը վստահեցրեց, որ էներգախնայողության հարցը մշտապես եղել է ՀՀ էներգետիկայի և բնական պաշարների նախարարության ուշադրության կենտրոնում:

ՀՀ հանրային ծառայությունները կարգավորող հանձնաժողովն իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը: ՀՀ հանրային ծառայությունները կարգավորող հանձնաժողովի նախնական գնահատմամբ` էլեկտրաէներգետիկական համակարգի ընկերությունների ֆինանսական կայունության և սպառողներին հուսալի ու անվտանգ էլեկտրամատակարարման ապահովման նպատակով անհրաժեշտ է շուրջ 20 մլրդ դրամ (առանց ԱԱՀ-ի) լրացուցիչ գումար: Ընկերությու ններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում' 3,8-4,3 դրամ/կՎտժ-ի (ներառյալ ԱԱՀ-ն) սահմաններում: