Ֆինանսների նախարարը ՓՄՁ-ների զարգացման համար կարևորեց մատչելի և երկարաժամկետ վարկավորումը

Հայաստանում փոքր և միջին ձեռնարկատիրության զարգացման համար կարևոր է ցածր տոկոսադրույքներով, երկարաժամկետ և մատչելի վարկերի ապահովումը, քանի որ դրա բացակայության պայմաններում շատ հետաքրքրիր գործարար ծրագրեր այդպես էլ չեն իրագործվում: Ելույթ ունենալով Հարավարևելյան Եվրոպայի եվրոպական հիմնադրամի (EFSE) տարեկան համաժողովին' այս մասին նշեց ՀՀ ֆինանսների նախարար Գագիկ Խաչատրյանը: Նա եվրոպացի պատվիրակություններին տեղեկացրեց, որ Հայաստանի կառավարությունը ներկայումս սկսել է մի շարք ծրագրեր, որոնք ուղղված են ՓՄՁ զարգացմանը: «Գիտակցելով փոքր և միջին ձեռնարկատիրության դերը տնտեսության մեջ' ներկայումս Հայաստանում փոփոխություններ են ձեռնարկվել հարկային դաշտում, որը կհեշտացնի ՓՄՁ-ների գործունեությունը և բարենպաստ պայմաններ կստեղծի դրանց զարգացման համար: Մասնավորապես, կառավարությունը նպատակ է հետապնդում ստեղծել իրական փոքր և միջին ձեռնարկատիրություն, որը դրական ազդեցություն կունենա տնտեսության ստվերի կրճատման և տնտեսվարող սյուբեկտների փոխգործակցության ավելացման համար»,- ասաց Խաչատրյանը:

Նա նշեց, որ հարկային բարեփոխումների այս փաթեթով նախատեսվում է լուծել մի շարք հարցեր, որոնք էականորեն կթեթևացնեն ՓՄՁ-ների հարկային բեռը, որն էլ իր հերթին կնպաստի ստվերային տնտեսության կրճատմանը: Նշված փոփոխությունները կապահովեն բարենպաստ հարկման դաշտ' թույլ տալով ձեռնարկություններին ընդլայնվել և նոր աշխատատեղեր ստեղծել: «Միաժամանակ, ՓՄՁ զարգացման համար կարևոր է ցածր տոկոսադրույքներով, երկարաժամկետ և մատչելի վարկերի ապահովումը: Նպաստավոր պայմաններով վարկավորումն անչափ կարևոր է, քանի որ դրա բացակայության պայմաններում շատ հետաքրքրիր գործարար ծրագրեր այդպես էլ չեն իրագործվում: Նպաստավոր պայմաններով վարկավորումն էականորեն կավելացնի ՓՄՁ-ների թիվը Հայաստանում»,- նշեց նախարարը:

Հարավ-արևելյան Եվրոպայի և Եվրոպական հարևանության քղաքականության տարածաշրջանի ֆինանսական հատվածի շուրջ 200 փորձագետներ հավաքվել են Երևանում, որտեղ անցկացվում է Հարավարևելյան Եվրոպայի եվրոպական հիմնադրամի (EFSE) տարեկան համաժողովը: Հանդիպման կարգախոսն է «16 երկիր… և ձեռնարկատիրության զարգացման հնարավորությունները»: