Թուրք ժխտողականներին չհաջողվեց խափանել ցեղասպանությանը նվիրված ելույթը Ավստրալիայի խորհրդարանում. «Կալիֆորնիա կուրիեր»

Ավստրալիայի խորհրդարանում Հայոց ցեղասպանության տարելիցին նվիրված ելույթը բոյկոտելու թուրքական լոբբիստական խմբի ջանքերն ապարդյուն են անցել: Այս մասին նշում է «Կալիֆորնիա կուրիեր» թերթի խմբագիր Հարութ Սասունյանը, ում Ավստրալիայի Հայոց ցեղասպանության հարյուրամյակի հանձնախումբը հրավիրել էր ապրիլի 24-ի շաբաթվա ընթացքում ելույթ ունենալ Սիդնեյի և Մելբուռնի ոգեկոչման միջոցառումներում, ինչպես նաև պաշտոնական ճառով հանդես գալ Նոր Հարավային Ուելսի խորհրդարանում:

«Ապրիլի 27-ին Ավստրալիայի թուրքական շահերի պաշտպանության միությունը երեք էջանոց նամակ հղեց խորհրդարանի բոլոր անդամներին՝ կոչ անելով բոյկոտել իմ ելույթը: Խորհրդարանի անդամներից մեկը նամակի պատճենը փոխանցեց Ավստրալիայի Հայ դատի հանձնախմբին իմ ելույթի նախօրեին: Հմտորեն շարադրված նամակը, ամենայն հավանականությամբ գրված Թուրքիայի դեսպանատան արհեստավարժ լոբբիստների կողմից, մի քանի սխալ պնդումներ և զրպարտիչ մեղադրանքներ էր պարունակում: Թուրքական ժխտողական խումբը ձգտում էր Անկարայի մարդու իրավունքների սահմանափակումները ներմուծել մի այնպիսի ժողովրդավարական երկիր, ինչպիսին Ավստրալիան է, փորձելով սահմանափակել ոչ միայն տվյալ ելույթ ունեցողի խոսքի ազատությունը, այլև խորհրդարանի՝ իր ընտրած անձանց հրավիրելու իրավունքը»,- նշում է Սասունյանը:

Հոդվածագրին անվանելով «պրոպագանդիստ», որն «օգուտ է քաղում հակամարտությունից և ատելությունից», թուրքերն իրենց նամակում «խստորեն» խորհուրդ էին տվել պատգամավորներին ներկա չլինել ելույթին: Ավստրալիայի թուրքական միության գործադիր տնօրեն Գյունեշ Գյունգորը կեղծ հայտարարություն էր տարածել, թե իբր Սասունյանը Համբիկ Սասունյանի «ազգականն» է, սոսկ այն պարզ պատճառով, որ կրում է նույն ազգանունը:

Նշվում է, որ Համբիկը Սասունյանը մեղավոր էր ճանաչվել 1982 թվականին Լոս Անջելեսում Թուրքիայի գլխավոր հյուպատոսի սպանության համար: «Թեև յուրաքանչյուր մարդու կյանքը շատ թանկ է, սակայն Գյունգորը կոկորդիլոսի արցունքներ է թափում միայն մի թուրք դիվանագետի մահվան առիթով՝ անտեսելով 1.5 միլիոն անմեղ հայերի զանգվածային սպանությունները… Ինչքանո՞վ դուր կգա Գյունեշ Գյունգորին, եթե նրան մեղադրեմ մի քանի հանցագործների հետ «ազգակցական» կապ ունենալու մեջ, որոնց գտել եմ համացանցում, միայն այն պատճառով, որ նրանք կրում են միևնույն ազգանունը»,- նկատում է հեղինակը' հավելելով, որ Գյունգորն իր նամակում նաև չարախոսել է ականավոր իրավաբան Ռաֆայել Լեմկինին, որն ստեղծել է «ցեղասպանություն» եզրույթը' Օսմանյան կառավարության կողմից հայերի բնաջնջման մանրամասն ուսումնասիրությունների հիման վրա:

Հուսահատորեն փորձելով ամեն գնով արատավորել Լեմկինի անբասիր վարկը, թուրքական միության գործադիր տնօրենը պնդել է, թե «նիստի վերջում նրա ագրեսիվ մեկնաբանությունների պատճառով նրան [Լեմկինին] դուրս են հրավիրել սենյակից:

Վերջում թուրք պրոպագանդիստը փորձել է ներկայացնել Հայոց ցեղասպանության և հրեական Հոլոքոստի միջև եղած տարբերությունը: Հայոց ցեղասպանության հարցերում փորձագետ ձևանալուց հետո նա խոստովանել իր տգիտությունը' նշելով, որ «Օսմանյան կայսրության վերջին շրջանի մասին դեռ շատ բան պետք է իմանալ և շատ եզրակացություններ անել»: Հակառակ թուրք լոբբիստի փորձերին՝ ավստրալացի պատգամավորները և հյուրերը, այդ թվում՝ գիտնականներ, ընտրված պաշտոնյաներ և հրեական համայնքի ղեկավարներ Սասունյանին դիմավորել են հոտընկայս ծափահարություններով:

Ավստրալիայի Հայ դատի հանձնախմբի տվյալների համաձայն՝ Սիդնեյում ապրիլի 24-ին նրա առաջին ելույթի ժամանակ 1100 մարդ է ներկա եղել: Ապա, ապրիլի 27-ին նա ելույթով հանդես է եկել Մելբուռնում' 500 հյուրերի ներկայությամբ: