Խորհրդարանը քննարկում է Հայաստանում տրանսֆերային գնագոյացման վերաբերյալ միջազգային առաջավոր փորձը ներդնող նախագիծը

Ազգային ժողովը քննարկում է «Տրանսֆերային գնագոյացման մասին» ՀՀ օրենքի նախագիծն առաջին ընթերացմամբ ընդունելու հարցը: Հիմնական զեկուցողը' ՀՀ ֆինանսների նախարարի տեղակալ Վախթանգ Միրունյանը, ներկայացնելով օրենքի նախագիծը, նշեց, որ օրենքը սահմանում է տրանսֆերային գնագոյացման հասկացությունը, մեթոդները, որոնց վրա հիմնվում է տրանսֆերային գնագոյացումը, ինչպես նաև կարգավորում է տրանսֆերային գնագոյացման հետ կապված մյուս հարաբերությունները: «Օրենքի նախագծի նպատակը փոխկապակցված անձանց միջև իրականացվող գործարքների պայմանների կարգավորման համար տրանսֆերային գնագոյացման համակարգի ներդրումն է: Մասնավորապես, նախագծի նպատակն է ներդնել «պարզած ձեռքի հեռավորության» սկզբունքը, որը կիրառվող միջազգային ստանդարտ է և հաստատված է Եվրոպական միության եւ կրկնակի հարկումը բացառելու ՀՀ հարկային համաձայնագրերում ներառված պետությունների կողմից»,- ասաց նա:

Միրումյանը նշեց, որ ՀՀ հարկային համակարգի ներկայիս կառուցվածքը թույլ է տալիս կատարել տրանսֆերային գնագոյացման չարաշահումներ, ինչը հնարավոր չէ կարգավորել գործող օրենսդրության պայմաններում: Նրա խոսքով, միջազգային առևտուրը, օտարերկրյա ուղղակի ներդրումների մակարդակը կտրուկ աճել են Հայաստանում և շարունակում են աճել' ՀՀ հարկման բազաները (եկամտահարկի, շահութահարկի, մետաղական օգտակար հանածոների ռոյալթիների մասով) ենթարկելով ռիսկի' կապված տրանսֆերային գնագոյացման չարաշահումների հետ: «Վերջին տարիներին մեծածավալ առևտուր է իրականացվում օֆշորային և ազատ տնտեսական գոտիներում»,- ասաց փոխնախարարը:

«Բնապահպանական և բնօգտագործման վճարների մասին» ՀՀ օրենքում կատարվել են փոփոխություններ, որոնց արդյունքում մետաղական օգտակար հանածոների համար վճարվող ռոյալթիները կարող են ուղղակիորեն կապված լինել փոխկապակցված անձանց գործարքների հետ: Միրումյանի խոսքով, չնայած Հայաստանը աշխարհի 37 երկրների հետ ունի կրկնակի հարկման համաձայնագրեր, սակայն գործող օրենսդրությունը բավարար չէ տրանսֆերային գները վերանայելու եւ ճշգրտելու համար: