Կանոնակարգվում է գույքի վրա հարկային պարտավորությանը համաչափ արգելանք դնելու և այն վերացնելու ընթացակարգը

Ազգային ժողովն ավարտեց «Հարկերի մասին» ՀՀ օրենքում փոփոխություն կատարելու մասին օրենքի նախագիծը, որով առաջարկվում է հստակեցնել հարկային մարմնի կողմից հարկ վճարողի գույքի վրա հարկային պարտավորությանը համաչափ արգելանք դնելու և արգելանքը վերացնելու ընթացակարգը: Հիմնական զեկուցողը' ՀՀ էկոնոմիկայի նախարար Կարեն Ճշմարիտյանը, նշեց, որ օրենքի նախագծի ընդունումը կվերացնի տնտեսվարող սուբյեկտների աշխատանքների անընդհատության խոչընդոտները և կապահովի թափանցիկ միջավայր: «Ներկայումս բացակայում է հարկային մարմնի կողմից հարկ վճարողի գույքի վրա արգելանք դնելու և արգելանքը վերացնելու հստակ' ըստ քայլերի հաջորդականության կարգը, որն առաջացնում է լրացուցիչ վարչարարության անհրաժեշտություն և անորոշություն գործարարների համար: Ընթացակարգի անկատարության հետևանքով գործնականում արգելադրվում են գործարարների բանկային հաշիվներին առկա ամբողջ դրամական միջոցները, առանց հաշվի առնելու պարտավորության չափը, ինչը խոչընդոտներ է առաջացնում ձեռնարկատիրական գործունեություն իրականացնողների համար»,- ասաց Ճշմարիտյանը:

Մանրամասնելով՝ նախարարը նշեց, որ բանկերը, առաջնոդրվելով «Բանկային գաղտնիքի մասին» ՀՀ օրենքով, հարկային մարմնին չեն կարող տեղեկություն հայտնել բանկային հաշիվներին առկա գումարների չափի մասին, և գործնականում արգելադրվում է բանկային հաշիվների առկա ամբողջ գումարը: «Այն դեպքում, երբ ձեռնարկատերը ունի հաշիվներ մեկից ավելի բանկերում, հարկային մարմնի որոշումը ուղարկվում է բոլոր բանկերին եւ արգելանք է դրվում ձեռնարկատիրոջ' բոլոր բանկերում ունեցած հաշիվներին առկա դրամական միջոցների վրա, եթե անգամ մեկ հաշվին առկա գումարը համապ ատասխանում է հարկային պարտավորության չափին»,- ասաց նախարարը՝ հավելելով, որ հարկ վճարողի կողմից հարկային պարտավորությունների մարման կամ օրենքով սահմանված կարգով պարտավորությունների մարման ժամանակացույց կազմելու դեպքում կարգավորված չէ, թե ինչ ժամկետում եւ ինչի հիման վրա առեւտրային բանկերը պետք է վերացնեն արգելանքը:

Ճշմարիտյանի խոսքով՝ ՀՀ կառավարությունն ու մի շարք միջազգային կառույցներ ակտիվ համագործակցում են հարկային դաշտը հնարավորինս հստակեցնելու, թափանցիկ դարձնելու նպատակով: Մասնավորապես, ՀՀ կառավարությունն իրականացնում է տեսչական բարեփոխումներ, որոնց շրջանակում նախատեսվում է թեթևացնել տնտեսավարող սոուբյեկտի վրա տեսչական' ընդհանրապես վարչական բեռը: