Արտեմ Ասատրյանը վստահեցնում է, որ մասնավոր հատվածի աշխատողների վրա ճնշումներ չեն լինի

ՀՀ աշխատանքի և սոցիալական հարցերի նախարար Արտեմ Ասատրյանը վստահեցնում է, որ կուտակային կենսաթոշակների մասին նոր օրինագծի ընդունումից հետո մասնավոր հատվածի աշխատողների վրա ճնշումներ չեն գործադրվի: Այս մասին նախարարը հայտարարեց «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ՝ պատասխանելով ՀԱԿ խմբակցության պատգամավոր Լյուդմիլա Սարգսյանի հարցին: «Մասնավոր հատվածի վրա ճնշում չգործադրելու երաշխիքներն ամրագրված են օրենսդրությամբ, և ես վստահ եմ, որ պետությունն այս հարցում իրականացնելու է իր գործառույթները և քայլեր է ձեռնարկելու, որպեսզի քաղաքացիներն այս հարցում խնդիրներ չունենան»,- ասաց նախարարը:

Արտեմ Ասատրյանը նաև ընդգծեց, որ երաշխիքները պետք է լինեն ոչ թե իր կողմից ԱԺ ամբիոնից հնչեցվող հայտարարությունները, այլ այն կանոնակարգերը, որոնք սահմանված են օրենքով: Ասատրյանը վստահեցրեց, որ պետությունն այս հարցում ունի իր գործառույթները և իրականացնելու է դրանք: