Դեղամիջոցները, պատվաստանյութերը և վիտամինները կենթարկվեն պարտադիր դրոշմավորման

Ազգային ժողովն ավարտեց «Առևտրի և ծառայությունների մասին» ՀՀ օրենքում լրացում կատարելու մասին օրենքի նախագծի քննարկումը, որով առաջարկվում է պարտադիր դրոշմավորման ենթարկել բոլոր դեղամիջոցները, պատվաստանյութերը, ինչպես նաև վիտամինները: Հիմնական զեկուցող, ՀՀ ֆինանսների նախարարի տեղակալ Վախթանգ Միրումյանը նշեց, որ օրինագծի ներկայացումը տրամաբանական շարունակությունն է Ազգային ժողովի կողմից ընդունված երկու այլ օրենքների, որով աստիճանաբար դրոշմապիտակներով պարտադիր դրոշմավորման դաշտ տեղափոխվեցին որոշ ապրանքախմբեր: «Վարչարարական այս գործիքի կիրառումն արդեն ապացուցել է իր առավելությունն ստվերային շրջանառությունների կրճատման առումով, և մենք հերթական քայլն ենք կատարում այս ուղղությամբ»,- ասաց Միրումյանը:

Փոխնախարարն ընդգծեց, որ դրոշմապիտակներով ապրանքների պարտադիր դրոշմավորման հարցում կառավարության մոտեցումը հայեցակարգային է, և կառավարությունը փուլ առ փուլ գնալու է դրոշմապիտակավորման ենթակա ապրանքների ցանկի ընդլայնմանը:

Նա ընդգծեց, որ օրենքով նախատեսվում է որոշակի անցումային ժամանակահատված: «Մասնավորապես, օրենքի ուժի մեջ մտնելուց հետո 3 ամիս ժամանակահատված կտրվի, որպեսզի ներմուծողները և արտադրողները կարողանան պիտակավորել, ինչպես նաև ևս 3 ամիս ժամանակահատված, որպեսզի հնարավոր լինի իրացնել շրջանառության փուլում գտնվող ապրանքները»,- եզրափակեց Միրումյանը: