Խոշոր խանութների համար ՀԴՄ-ների վրա գնված ապրանքը նշելու պարտավորությունը կգործի նոյեմբերից մեկից

Հայաստանի կառավարության ընդունած որոշմամբ` 500 մլն դրամը գերազանցող շրջանառություն ունեցող խանութների կողմից ՀԴՄ-ների վրա գնված ապրանքատեսակների ցանկը տպելու պարտավորվածությունը կգործի ոչ թե ընթացիկ տարվա հուլիսի մեկից, այլ նոյեմբերից մեկից: ՀՀ կառավարության նիստում Ֆինանսների նախարարի տեղակալ Արմեն Ալավերդյանը նշեց, որ այդ գործընթացի նկատմամբ հսկողությունը կառավարությունը կսկսի նոյեմբերի մեկից: «Քանի որ այս հարցը կապված է բիզնեսի տարբեր շերտերի հետ, ապա հուլիսի մեկից տարբեր պատճառներով հնարավոր չէ դա իրականացնել: Եթե տնտեսվարողները հնարավորություն ունենան դա անելու, ապա կարող են լուրջ պատասխանատվության ենթարկվել: Միայն նոյեմբերի մեկից սկսած' խոշոր տնտեսվարողները պարտավոր կլինեն ՀԴՄ կտրոն տրամադրել, որի վրա գրված կլինի ապրանքի տեսակի անունը»,- ասաց Ալավերդյանը:

Իր հերթին, ՀՀ վարչապետ Հովիկ Աբրահամյանը նշեց, որ նոր սերնդի ՀԴՄ-ները կոնկրետ ապրանքատեսակներով են կտրոնները տպելու: «Այս նոր ՀԴՄ-ները շատ կարևոր են: Ուղղակի ժամկետային առումով խնդիր ունենք, դրա համար ժամկետների տեղափոխում է իրականացվում»,- ասաց կառավարության ղեկավարը:

58 միլիոնից բարձր շրջանառութուն ունեցող սուբյեկտները նման ՀԴՄ-ներ կտրամադրեն 2015 թվականի ապրիլից, իսկ փոքր և միջին ձեռնարկատիրության ներկայացուցիչները՝ 2016 թվականի հունվարի մեկից: