Երևանի ՋԷԿ-ի տնօրենը պարզաբանեց վրացական էլեկտրաէներգիայի «ներկրման առեղծվածը»

Վրաստանից Հայաստան ներկրվող էլեկտրաէներգիան ամբողջությամբ տարանցիկ պայմաններով ուղղորդվում է Իրան, որի փոխարեն Հայաստանն Իրանից ստանում է համապատասխան ծավալի գազ: Այս մասին լրագրողների հարցին ի պատասխան նշեց Երևանի ՋԷԿ-ի տնօրեն Հովակիմ Հովհաննիսյանը՝ հավելելով, որ միայն անհրաժեշտության դեպքում է Իրան ուղարկված վրացական էլեկտրաէներգիայից հետ ներկրվում Հայաստան: «Դա կարող է լինել միայն այն դեպքում, եթե այստեղ վթար կա և հավելյալ էլեկտրաէներգիայի պահանջ է առաջացել: Մենք Վրաստանից էլեկտրաէներգիա չենք գնում, փողի մասին խոսք գնալ չի կարող: Իսկ նշված 16 դրամ սակագինը չի համապատասխանում իրականությանը, քանի որ Վրաստանից եկած էլեկտրաէներգիան ամբողջությամբ փոխանցվում է Իրան»,- ասաց Հովհաննիսյանը:

Վրացական էլեկտրաէներգիայի հարցը որոշակիորեն քննարկվել է Հանրային ծառայությունները կարգավորող հանձնաժողովի նիստի ժամանակ, երբ ՀԱԿ պատգամավոր Արամ Մանուկյանը հարց ուղղեց՝ նշելով, թե մինչ օրս հանրությունը գիտի, որ Հայաստանը էլեկտրաէներգիայի առումով ինքնաբավ է, և միայն էլեկտրաէներգիա է արտահանել, սակայն պարզվում է, որ այն Վրաստանից էլեկտրաէներգիա է ներմուծում:

Այս հարցին ի պատասխան հանձնաժողովի սակագնային քաղաքականության վարչության պետ Գարեգին Բաղրամյանը պատասխանել էր, որ Վրաստանը Հայաստանի միջոցով էլեկտրաէներգիա է արտահանում Իրան: Նա նշել էր, որ դա սեզոնային ներկրում է, և Երևանի ՋԷԿ-ն իր էլեկտրաէներգիայի հետ միասին արտահանում է Իրան եւ որոշակի հարաբերակցությամբ գազ է ներկրում: