Վրաստանից էլեկտրաէներգիայի տարանցումն Իրան անհրաժեշտ է միայն վթարների կամ վերանորոգումների ժամանակ

Հայաստանը Վրաստանից էլեկտրաէներգիա չի գնել, այլ առանձին բանակցությունների արդյունքում ձեռք է բերել համաձայնություն էլեկտրաէներգիան արտահանելու Իրան` լրացնելու այն բացը, որն առաջացել է վթարների կամ վերանորոգումների ժամանակ: Այս մասին լրագրողների հետ զրույցում ասաց ՀՀ էներգետիկայի և բնական պաշարների նախարար Երվանդ Զախարյանը' անդրադառալով այն լուրերին, որ Հայաստանը էլեկտրաէներգիա է գնել Վրաստանից: «Թյուրիմացություն է, երբ ասում են, որ մենք Վրաստանից էլեկտրաէներգիա ենք գնում: Սկսած 2009 թվականից' Հայաստանը Իրանից գազ է ստանում և փոխարենը մատակարարում է էլեկտրաէներգիա: Այս տարիների ընթացքում շուրջ 2 մլրդ խ/մ գազ է ստացվել և փոխարենը մատակարարել 6 մլրդ կՎ/ժամ էկետրաէներգիա: Այդ ընթացքում եղել են վերանորոգման աշխատանքներ կամ վթարներ, և որպեսզի ստացած գազի դիմաց մենք կարողանայինք ամբողջովին ապահովել մատակարարվող էլեկտրաէներգիան, որոշակի քանակ վերցրել ենք Վրաստանից»,- ասաց Զախարյանը:

Նա նշեց, որ դա ծրագրային բնույթ չի կրում, և յուրաքանչյուր դեպքի համար տարվում են առանձին բանակցություններ: «Այստեղ խոսք չի գնում գնման մասին: Եթե վրացական էլեկտրաէներգիայի փոխարեն մենք փորձեինք արտահանել Հրազդան ՋԷԿ-ի կամ Հրազդանի 5-րդ էներգաբլոկի արտադրած էլեկտրաէներգիան, ապա սակագնային առումով կորուստներն ավելի մեծ կլինեին»,- ասաց նախարարը:

Վրացական էլեկտրաէներգիայի հարցը որոշակիորեն քննարկվել էր Հանրային ծառայությունները կարգավորող հանձնաժողովի նիստի ժամանակ, երբ ՀԱԿ պատգամավոր Արամ Մանուկյանը հարց ուղղեց հանձնաժողովին՝ նշելով, թե մինչ օրս հանրությունը գիտի, որ Հայաստանն էլեկտրաէներգիայի առումով ինքնաբավ է, և միայն էլեկտրաէներգիա է արտահանել, սակայն պարզվում է, որ այն Վրաստանից էլեկտրաէներգիա է ներմուծում:

Այս հարցին ի պատասխան հանձնաժողովի սակագնային քաղաքականության վարչության պետ Գարեգին Բաղրամյանը պատասխանել էր, որ Վրաստանը Հայաստանի միջոցով էլեկտրաէներգիա է արտահանում Իրան և դա սեզոնային ներկրում է: