Բաքվի քաղաքապետի վահաբի որդին ձերբակալվել կամ փախչել է. Axar.az

Բաքվում լուրեր են տարածվել քաղաքապետ Հաջիբալա Աբութալիբովի վահաբի որդու' Իսրաֆիլ Աբութալիբովի ձերբակալության կամ երկրից փախչելու մասին:

Այդ մասին axar.az կայքին տեղեկացրած աղբյուրի խոսքով՝ Իսրաֆիլ Աբութալիբովն Ադրբեջանի ազգային անվտանգության և ներքին գործերի նախարարությունների կողմից ձերբակալվել է անցյալ շաբաթ Բաքվի Իչերիշեհեր թաղամասում գտնվող Աշուրբեյ (Լեզգի մզկիթ) մզկիթում անցկացված գործողությունից հետո:

Բավական ժամանակ է, ինչ ադրբեջանական ԶԼՄ-ները գրում են կառավարական ուժերի դեմ Սիրիա կռվելու մեկնող ադրբեջանցի վահաբիների մեջ Իսրաֆիլ Աբութալիբովի կողմից պրոպագանդա անցկացվելու և նրանց ֆինանսական աջակցություն ցուցաբերելու մասին: Նշվում է, որ Աշուրբեյ մզկիթում անցկացված գործողության ժամանակ իրավապահ մարմինների աշխատակիցները հավատացյալներին հարց ու փորձ են արել Իսրաֆիլ Աբութալիբովի մասին:

Ադրբեջանի ազգային անվտանգության և ներքին գործերի նախարարությունների աշխատակիցերը հունիսի 20-ին Բաքվի Աշուրբեյ մզկիթում ձերբակալել են 20 վահաբիների: Այդ մասին տեղեկությունները հաստատել են նախարարությունները: Գործողության հետ կապված լուսանկարներ և լուրեր են տարածվել ադրբեջանական մամուլում: Սակայն, Բաքվի քաղաքապետ Հաջիբալա Աբութալիբովի քարտուղարուհին կայքին հերքել է նրա որդու ձերբակալության կամ երկրից փախչելու մասին տարածված լուրերը:

Նշվում է, որ Իսրաֆիլ Աբութալիբովը ձերբակալվել է «Իրաքի և Լևանտի իսլամական պետություն» ահաբեկչական խմբավորմանը միանալու համար ադրբեջանցի վահաբիների համար երկիրը լքելու պայմաններ ստեղծելու, ֆինանսավորելու և ահաբեկչական խմբավորման հետ կապեր ունենալու պատճառով: Նշվում է նաև, որ Բադամդարում գտնվող սալաֆիների աղոթատեղիներում անցկացված ստուգումների ժամանակ մեծ քանակությամբ կանխիկ գումար է հայտնաբերվել, և դա է եղել Իսրաֆիլ Աբութալիբովի ձերբակալության հիմնական պատճառը:

Ադրբեջանական մամուլն ավելի վաղ հայտնել էր, որ Հաջիբալա Աբութալիբովը հրաժարվել է որդուց, և նրանց միջև ներկայում ոչ մի կապ չկա: