Կառավարությունը ՓՄՁ-ների համար հետաձգեց նոր սերնդի ՀԴՄ-ների կիրառման ժամկետները

Փոքր և միջին ձեռնարկատեր հարկ վճարողների համար հսկիչ դրամարկղային մեքենաների տրամադրումը հետաձգվում է: Բացի այդ, սահմանվում են ՀԴՄ-ների ձեռքբերման տարբերակված գներ, ընդ որում' սահմանամերձ գյուղերի համար նախատեսվում է ՀԴՄ-ները սահմաննել անվճար, իսկ այլ գյուղրում' 50 տոկոսով ցածր գներով: ՀՀ կառավարության նիստի ժամանակ Ֆինանսների նախարար Գագիկ Խաչատրյանը նշեց, որ նախագծով առաջարկվում է 30-58.35 միլիոն դրամ իրացումից հասույթ ունեցող հարկ վճարողների համար ՀԴՄ-ների ներդրման ժամկետ սահմանել 2014 թվականի օգոստոսի 1-ը: «10 մլն դրամից մինչև 30 մլն դրամ իրացումից հասույթ ունեցող հարկ վճարողների համար վերջնաժամկետ է սահմանվում 2014 թվականի հոկտեմբերի 1-ը, իսկ մինչև 10 մլն դրամ իրացումից հասույթ ունեցող հարկ վճարողների համար' 2015 թվականի հունվարի 1-ը»,- ասաց Խաչատրյանը:

Նա տեղեկացրեց, որ 1-ին խմբի հարկ վճարողների համար հսկիչ-դրամարկղային մեքենաների իրացման գին է սահմանել առավելագույնը 150 հազար դրամ , 2-րդ խմբի համար' 120 հազար դրամ, 5 մլն դրամից մինչև 10 մլն դրամ իրացումից հասույթ ունեցող հարկ վճարողների համար' առավելագույնը 80 հազար դրամ, իսկ մինչև 5 մլն դրամ իրացումից հասույթ ունեցող հարկ վճարողների համար' առավելագույնը 60 հազար դրամ: Ֆինանսների նախարարը նշեց, որ օգնության տրամադրման հարցը պետք է ավելի մանրամասն քննարկվի:

ՀՀ վարչապետ Հովիկ Աբրահամյանը նշեց, որ անհրաժեշտ է հասարակությանը տեղեկացնել այն լրացուցիչ բեռի մասին, որն ընկնելու է կառավարության ուսերին: «Այս նախագծի իրականացումը կառավարության համար կարժենա ավելի քան 4,5 մլրդ դրամ»,- ասաց վարչապետը:

Որոշումը հնարավորոություն է տալիս մինչև 2015 թվականը տնտեսության բոլոր ճյուղերում ներդնել նոր սերնդի հսկիչ դրամարկղային մեքենաները: