ՀՀ քաղաքացի աշխատանքային միգրանտները Ռուսաստանում կօգտվեն արտոնյալ պայմաններից

Հայաստանից Ռուսաստան տեղափոխված աշխատանքային միգրանտների և նրանց ընտանիքների անդամների համար այսուհետ սահմանվում է ավելի բարենպաստ ռեժիմ, քան նախատեսված է Մաքսային Միության անդամ չհանդիսացող պետությունների քաղաքացիների համար: Այս մասին ՀՀ կառավարության նիստի ժամանակ հայտնեց ՀՀ միգրացիոն պետական ծառայության պետ Գագիկ Եգանյանը' նշելով, որ աշխատանքային միգրանտներին վերաբերող նոր օրենքը կսկսի գործել միայն 2015թ. հունվարի 1-ից, քանի որ Մաքսային միության և Միասնական տնտեսական տարածքի իրավապայմանագրային բազան ՀՀ-ի համար ուժի մեջ է մտնելու այդ ժամկետից սկսած: «Այդ օրենքով' գործատուների կողմից միգրանտ աշխատողներին ներգրավելու հետ կապված գործունեությունն իրականացվում է առանց ազգային աշխատանքային շուկայի պաշտպանության վերաբերյալ սահմանափակումները հաշվի առնելու: Միևնույն ժամանակ, միգրանտ աշխատողներին հարկավոր չէ ստանալ աշխատանքային գործունեություն իրականացնելու թույլտվություն: Հաշվի առնելով համաձայնագրի դրույթների կարևորությունը՝ նպատակահարմար է համարվել մինչև Մաքսային Միությանն անդամակցությունը քննարկումներ սկսել ռուսական կողմի հետ՝ նշված հարցերը կարգավորող երկկողմ համաձայնագիր ստորագրելու շուրջ»,- պարզաբանեց Եգանյանը:

Նա տեղեկացրեց, որ համապատասխան արձանագրության ստորագրումը թույլ կտա նշված դրույթը կիրարկել ավելի վաղ ժամկետում, ինչը բխում է ՌԴ-ում աշխատանքային գործունեություն իրականացնող ՀՀ քաղաքացիների շահերից:

Մայիսի 28-ից 29-ը ՌԴ միգրացիոն դաշնային ծառայությունում ՀՀ ՏԿՆ միգրացիոն պետական ծառայության պետի ունեցած աշխատանքային քննարկումների արդյունքում նախնական համաձայնեցվել էր Արձանագրության նախագծի տեքստը:

Մաքսային միությանը և Միասնական տնտեսական տարածքին Հայաստանի Հանրապետության միացման ճանապարհային քարտեզի 222-րդ կետով նախատեսվում է, որ Հայաստանի Հանրապետությունը Մաքսային միությանը և Միասնական տնտեսական տարածքին անդամակցության պահին պետք է միանա «Աշխատանքային միգրանտների և նրանց ընտանիքների անդամների իրավական կարգավիճակի մասին» 2010թ. նոյեմբերի 19-ի համաձայնագրին: