Ադրբեջանի իշխանություններին այլևս չի հաջողվում շանտաժի ենթարկել Արևմուտքին. «Ազադլըգ»

Ադրբեջանի իշխանությունը լուրջ անհանգստացած է Արևմուտքի դեմ Ռուսաստանի գործոնով շանտաժի քաղաքականության ձախողման պատճառով: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը' նշելով, որ մինչ վերջերս մարդու իրավունքների հետ կապված Արևմուտքի կոչերին Ադրբեջանի իշխանությունը պատասխանում էր ավանդաբար' շանտաժի լեզվով, իսկ պաշտոնական և կառավարության վերհասկողության տակ գտնվող ԶԼՄ-ներն էլ շարունակաբար արշավ էին տանում ԱՄՆ-ի և Եվրոպայի դեմ:

«Ադրբեջանն Արևմուտքին շանտաժ էր անում Ռուսաստանի գործոնով: Իշխանությունը կարծում էր, որ ինչպես նախկինում, այս անգամ ևս Արևմուտքը տեղի կտա շանտաժի արշավին' չխորացնելով իշխանության հետ հարաբերությունների փչացումը, հաշվի կառնի Ռուսաստանի վտանգը և այլն: Սակայն, այս անգամ հակառակը տեղի ունեցավ: Սկզբունքայնություն ցուցադրելով դիրքորոշման մեջ, Արևմուտքն ավելի խստացրեց մարդու իրավունքների, դեմոկրատական սկզբունքների հարցերում Ադրբեջանի իշխանություններին արվող կոչերը: Ադրբեջանի իշխանությունը հզոր հարված ստացավ, նույնիսկ, իրեն ազատ և վստահ զգացող տեղում' Եվրոպայի Խորհրդի խորհրդարանական վերհաժողովում (ԵԽԽՎ): Դրա օրինակը կարող է լինել ԵԽԽՎ-ում երկրի ղեկավար Իլհամ Ալիևի' տհաճ հարցերի հետ առնչվելու փաստը: Մինչ այժմ ոչ մի երկրի ղեկավարի դեմ նման վատ վերաբերմունք չէր ցուցաբերվել: Նույնիսկ կառավարության ներկայացուցիչներն են խոստովանում, որ ԵԽԽՎ-ում Իլհամ Ալիևի դեմ ագրեսիա կար:

Բացի դրանից, Բաքվում ԵԱՀԿ ԽՎ-ի անցկացրած նստաշրջանում, չնայած իշխանության դիմակայությանը, Ադրբեջանի ժողովրդավարացման համար կարևոր որոշումներ ընդունվեցին: Իշխանությունն այդ նստաշրջանում պարտություն կրեց այն առումով, որ երկրում գործող քաղաքացիական հասարակության ինստիտուտները պաշտպանություն գտան ԵԱՀԿ մակարդակով, կառույցը որոշեց վերականգնել Բաքվում իր գրասենյակի գործունեությունը, պահանջեց Անար Մամեդլիին ճանաչել որպես քաղբանտարկյալ և այլն: Բացի այդ, եվրոպացի պատգամավորները նստաշրջանում բարձրաձայնեցին Ադրբեջանում խոսքի և մամուլի ազատությունը խեղդելու, քաղաքական կուսակցություններին, իրավապաշտպաններին ճնշումների ենթարկելու մասին: Եթե նախկինում իշխանությունն այդ ճնշումների դեմ կարողանում էր Արևմուտքին հետ պահել Ռուսաստանին ռեվերանսներ անելու միջոցով, ապա այժմ արդեն դա ևս արդյունք չի տալիս: Քանի որ իշխանությունը հասկանում է, որ Ռուսաստանն ինքը ևս լուրջ ճնշումների առաջ է կանգնած: Այսպիսով, լուրջ անհանգստություն ապրող իշխանությունը հայտնվել է նաև անորոշության մեջ և դժվարանում է որոշել, թե ինչ պետք է անի Արևմուտքի կողմից պահանջվող դեմոկրատական բարեփոխումները մերժելուց հետո»,- գրում է «Ազադլըգ»-ը: