ԱՊՀ երկրների շարքում Հայաստանն առաջարկում է ամենաէժան կենդանական ծագման մթերքը

Հայաստանում արտադրվող կենդանական ծագման մթերքների արտադրության ծավալները նախորդ տարվա համեմատ ընթացիկ տարում կավելանան մոտ 7 տոկոսով: Այս մասին հայտնեց ՀՀ գյուղատնտեսության նախարարության անասնաբուծության և անասնաբուժության վարչության պետ Աշոտ Հովհաննիսյանը՝ հուլիսի 4-ին կայացած մամուլի ասուլիսի ժամանակ:

«Հարկ է նշել, որ վերջին տարիներին մեր հանրապետությունում նկատվում են գյուղատնտեսական կենդանիների գլխաքանակի կտրուկ աճի միտումներ, ինչով էլ պայմանավորված է կենդանական ծագման մթերքների արտադրության ծավալների կայուն աճը»,- նշեց Աշոտ Հովհաննիսյանը:

Նրա հավաստմամբ՝ ԱՊՀ երկրների շարքում Հայաստանը երեք տարի անընդմեջ բարձր դիրք է գրավում նախորդ տարվա համեմատ անասնագլխաքանակի աճի ցուցանիշներով: «Հայաստանն ԱՊՀ երկրների շարքում առաջին կամ երկրորդ հորիզոնականում է գտնվում կենդանական ծագման սննդամթերքի էժանությամբ: 1 կիլիոգրամ տավարի մսի գներով Հայաստանը զիջում է միայն Բելառուսին, իսկ պանրի ամենացածր գները ձևավորված են Հայաստանում»,- «Արմենպրես»-ի փոխանցմամբ՝ ասաց պաշտոնյան՝ շեշտելով, որ անասնաբուծության ներկայիս միտումները թույլ են տա լիս կանխատեսել, որ առաջիկայում կենդանական ծագման մթերքների արտադրության ծավալների կայուն ու տևական աճ է գրանցվելու:

Համաձայն գյուղնախարարության կողմից կատարված վերլուծությունների' ընթացիկ տարվա առաջին կիսամյակի տվյալներով՝ երկրում արտադրվել է շուրջ 407 հազար տոննա կաթ՝ կամ նախորդ տարվա համեմատ տոկոսով ավելի, 35 հազար տոննա միս (7 տոկոս աճ), 393 միլիոն հատ ձու (4.5 տոկոս աճ):