Հայաստանը ԵՏՄ-ին կանդամակցի «հավասարը հավասարի հետ» սկզբունքով. Վահրամ Բաղդասարյան

Եվրասիական տնտեսական միությանն անդամակցելու համար Հայաստանն ուներ տեխնիկական հարցեր, և մեր երկիրը պայմանավորված ժամկետներում բոլոր հարցերը կարգավորել է: Այժմ համաձայնեցված համաձայնագիրն ուղարկվել է ԵՏՄ անդամ բոլոր պետություններին' ներպետական համաձայնեցման համար: ՀՀԿ խմբակցության ղեկավար Վահրամ Բաղդասարյանի գնահատմամբ' ներպետական
համաձայնեցումից հետո անդամակցության համաձայնագիրը կստորագրվի:

«Կարող եմ հայտարարել, որ որևէ նախապայմաններ չենք ընդունելու և «հավասարը հավասարի հետ» ձևով են անդամակցելու ԵՏՄ-ին: Խանգարող խոչընդոտներ չկան: Դրանք հիմնականում տեխնիկական խոչընդոտներ էին, և դրանք արդեն վերացված են: Եթե լինեն նոր պայմաններ, ապա այդ դեպքում ևս Հայաստանը հավասար պայմանների դեպքում է պատրաստ անդամակցել ԵՏՄ-ին, բայց, էլի եմ կրկնում, որևէ խնդիրև չկա»,- ասաց Վահրամ Բաղդասարյանը:

Անդրադառնալով Ռուսաստանի փոխվարչապետ Իգոր Շուվալովի հայտարարությանը, թե ԵՏՄ-ին անդամակցելու պարագայում Հայաստանը պետք է ԱՀԿ-ի հետ համաձայնագրում գնա որոշակի զիջումների, Բաղդասարյանը նշեց. «Մենք մեր խնդիրների լուծումն ավարտել ենք, տեխնիկական խնդիրները լուծել, և համաձայնագիրի նախագիծն ուղարկված է անդամ-երկրների համաձայնեցմանը: Քննարկումներից հետո այն պարզ կդառնա բոլորի համար: ԱՀԿ-ն տարածքների խնդիր չի լուծում, և մենք մեր դիրքորոշումը հայտնել ենք, հարցերը' լուծել, և պետք չէ ծանրանալ դրա վրա: Ժամանակը կգա, բոլոր հարցերի պատասխանը կունենաք»,- ասաց Բաղդասարյանը:

Նրա փոխանցմամբ' ամենայն հավանականությամբ, ամռանը կկայանա Սերժ Սարգսյան-Վլադիմիր Պուտին հանդիպումն ու այդտեղ կքննարկվեն համաձայնագրի ստորագրման և անդամակցության հարցերը: 

Հուլիսի 2-ին Ղազախստանի արտգործնախարար Երլան Իդրիսովը հայտնել է, որ Եվրասիական տնտեսական միությանը Հայաստանի անդամակցության համաձայնագիրը կարող է ստորագրվել այս տարվա հոկտեմբերին: «Համապատասխան փաստաթղթերի ստորագրումը, ամենայն հավանականությամբ, տեղի կունենա Մինսկում, հոկտեմբերին՝ Եվրասիական տնտեսական միության անդամ երկրների նախագահների հերթական հանդիպման ընթացքում», - «Արմենպրես»-ի փոխանցմամբ' գրել է Ղազախստանի արտգործնախարարը Թվիթերում՝ օգտատերերի հետ հարցուպատասխանի ընթացքում:

Հուլիսի 1-ին «Արմենպրես»-ի հետ զրույցում ՀՀ ԱԳ փոխնախարար Շավարշ Քոչարյանը շեշտել էր, որ Եվրասիական հանձնաժողովը կողմերին է ուղարկել Եվրասիական տնտեսական միությանն անդամակցելու վերաբերյալ նախապատրաստված պայմանագիրը ներպետական համաձայնեցման համար: Նախարարի խոսքերով, քանի որ հարցերը հիմնականում խորությամբ քննարկվել են, ապա, ամենայն հավանականությամբ, ներպետական համաձայնեցումը շատ երկար չի տևի: Ռուսաստանը, Բելառուսը և Ղազախստանը մայիսի 29-ին Աստանայում ստորագրեցին Եվրասիական տնտեսական միության մասին պայմանագիրը, այն ուժի մեջ կմտնի 2015թ․ հունվարի 1-ից: Հայաստանը, որ հայտ է ներկայացրել է Մաքսային միության անդամ դառնալու, ստեղծել է ճանապարհային քարտեզ և համաձայնեցրել բոլոր հարցերը: ԵՏՄ-ն կլինի վերպետական տնտեսական տարածք, որի անդամ երկրները միմյանց հետ կիրականացնեն առևտուր սահմանված հատուկ մաքսատուրքերով: