ՆԱՏՕ-ն Ուելսում կհաստատի, որ Վրաստանը դառնալու է դաշինքի անդամ. Ապատուրայ

ՆԱՏՕ-ի գլխավոր քարտուղարի՝ Հարավային Կովկասի և Կենտրոնական Ասիայի երկրների հարցերով հատուկ ներկայացուցիչ Ջեյմս Ապատուրայը, հուլիսի 10-ին մեկնելով Վրաստանից, հայտարարել է, որ դաշինքի գագաթնաժողովի նախաշեմին գոհ է երկրի ղեկավարների հետ անցկացրած հանդիպումներից, տեղեկացնում է «Արմենպրես»-ը՝ հղում անելով «Նովոստի Գրուզիան»: 

Վրաստան այցի ընթացքում, որն սկսվել է հուլիսի 9-ին, Ապատուրայը հանդիպում է ունեցել Վրաստանի նախագահ Գեորգի Մարգվելաշվիլիի, վարչապետ Իրակլի Ղարիբաշվիլիի, եվրոպական և եվրատլանտյան ինտեգրացման հարցերով պետնախարար Ալեքս Պետրիաշվիլիի, արտաքին գործերի նախարար Մայա Փանջիկիձեի, պաշտպանության նախարար Իրակլի Ալասանիայի հետ:

«Մենք լավ գաղափարներ ունենք, որոնք հանգամանորեն քննարկել ենք նախագահի, վարչապետի և երեք նախարարների հետ, այնպես որ ես շատ գոհ եմ մեկնում: Այժմ քննարկումներ կսկսվեն Բրյուսելում»,- լրագրողներին ասել է Ապատուրայը Թբիլիսիի միջազգային օդանավակայանում: Նա ընդգծել է, որ դաշինքի՝ սեպտեմբերի սկզբին կայանալիք գագաթնաժողովն արգասաբեր կլինի Վրաստանի համար:

«Կարծում եմ, որ Ուելսում կայանալիք գագաթնաժողովի արդյունքում Վրաստանը կտեսնի երեք բան. առաջինը՝ ՆԱՏՕ-ի ավելի մեծ ներկայություն Վրաստանում, ինչը օգնություն է ենթադրում Վրաստանին անվտանգության տեսանկյունից, ինչպես նաև աջակցություն երկրին, որպեսզի նա համապատասխանի ՆԱՏՕ-ի չափորոշիչներին: Երկրորդ՝ Վրաստանի ավելի մեծ ներկայություն ՆԱՏՕ-ում, կընդլայնվի երկրի մասնակցությունը դաշինքի ծրագրերին ու բանավեճերին: Երրորդ՝ մենք կհաստատենք, որ Վրաստանը դառնալու է ՆԱՏՕ-ի անդամ»,- հայտարարել է Ապատուրայը: