Տեխասի նահանգում չորս երեխաների ու ևս երկու հոգու գնդակահարողը եղել է ընտանիքի հայրը

ԱՄՆ-ի Տեխասի նահանգի Սփրինգ քաղաքում հուլիսի 9-ին չորս երեխաների և երկու չափահասների գնդակահարողը եղել է ընտանիքի հայրը, հաղորդում է «Արմենպրես»-ը՝ հղում անելով տեղի ոստիկանությանը: Հրաձիգի՝ վիրավորված 15-ամյա դուստրը ոստիկանությանը հայտնել է, որ զոհվածները եղել են իր երկու եղբայրները՝ չորս և 14 տարեկան, և երկու քույրերը՝ յոթ և ինը տարեկան, ինչպես նաև տանը գտնվող իրենց ազգականները՝ 33-ամյա մի կին և 39-ամյա մի տղամարդ: Երեխաներից երկուսը եղել են հոգեզավակներ:

Վիրավոր աղջիկը կարողացել է ոստիկանություն կանչել, ինչպես նաև հայտնել է, որ հայրն ավտոմեքենայով գնացել է տատիկի մոտ՝ նրան էլ սպանելու մտադրությամբ: Վկայի խոսքով՝ հրաձգության առիթ է դարձել ընտանեկան վեճը:

Աղջկա ցուցմունքների շնորհիվ ոստիկաններին հաջողվել է կանգնեցնել կրակողի ավտոմեքենան և ոստիկանական երկու զրահապատ հատուկ մեքենաներով այն մեկուսացնել քաղաքի փակուղիներց մեկում, ինչից հետո կասկածյալը հանձնվել է ոստիկանությանը:

Ինչպես հայտնել է քաղաքի շերիֆ Թոմաս Գիլիլենդը, հրաձիգը՝ 30-ից բարձր տարիքի տղամարդ, կալանավորման պահին իրեն հանգիստ է պահել: Երբ հրաձիգը համաձայնել է հանձնվել, ոստիկանները մոտեցել են նրա ավտոմեքենային: Նա դուրս է եկել մեքենայից, բարձրացրել ձեռքերը, ծնկի իջել ու ձերբակալվել, հաղորդել է «Ինտերֆաքս»-ը: