Ադրբեջանցի փաստաբանները դատի են տվել Ժիրինովսկուն. «Իզվեստիա»

Փաստաբան ամուսիններ Սադըք և Էլմիրա Մամեդովները Մոսկվայի Տվերյան դատարան հայց են ներկայացրել Ռուսաստանի Դաշնության Լիբերալ-դեմոկրատական կուսակցության առաջնորդ Վլադիմիր Ժիրինովսկու դեմ՝ ադրբեջանական ժողովրդի «պատիվն ու արժանապատվությունը» պաշտպանելու վերաբերյալ: Այս մասին, ինչպես հաղորդում է «Արմենպրես»-ը, հայտնում է «Իզվեստիա» թերթը:

Բացի այդ, հայցվորները խնդրում են պատասխանատվության ենթարկել նաև Պետդումային, որի լիագումար նիստում պատգամավորների կողմից ադրբեջանցիների հասցեին հնչել են, իրենց կարծիքով, անվայելուչ բացականչություններ:

2014 թվականի մարտի 11-ին ՌԴ պետդումայի լիագումար նիստում Ժիրինովսկին հայտարարել էր. «Ահա, ինչ՞ է Ադրբեջանը: Ես ձեզ ռուսերեն եմ թարգմանում: «Ազեր»-«Խազեր դենիզի» - Կասպից ծով, բաջա - ծայրամաս: Այսինքն' մարդիկ, որոնք ապրում են Կասպից ծովի ափին, ռուսերենով' կասպիականներ: Ի՞նչ է, կա՞ այդպիսի ազգություն' կասպիականներ: Դա այնտեղ բնակվող մարդիկ են: Մենք ասում ենք «Պովոլժիե»: Բայց այնտեղ կան մարիներ, թաթարներ, բաշկիրներ»:

Ադրբեջանցի փաստաբան ամուսինները դատարանին խնդրում են Ժիրինովսկուն պարտադրել Պետդումայում հանդես գալ հրապարակային հերքումով դատարանի վճռից անմիջապես հետո: Մամեդովները Ժիրինովսկուց պահանջում են 100 մլն ռուբլի բարոյական վնասի փոխհատուցում, ադրբեջանցիների, այդ թվում նաև իրենց ընտանիքի «պատիվն ու արժանապատվությունը» ստորացնելու համար: Նրանք պահանջում են նաև, որպեսզի խորհրդարանի ստորին պալատը ևս Ժիրինովսկուն պարտադրի հանդես գալ հերքումով: