ՀՀ-ն փորձելու է ապագայում կամրջող դեր ունենալ տնտեսական տարբեր միությունների միջև

Հուլիսի 17-ին ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը և հանձնաժողովի անդամ Մհեր Շահգելդյանը հանդիպեցին Նիդեռլանդների Թագավորության խորհրդարանի պատվիրակությանը՝ Ներկայացուցիչների պալատի պատգամավոր, «Ազատություն և ժողովրդավարություն» ժողովրդական կուսակցության ԵՄ հարցերով պատասխանատու Մարկ Ֆերհայենի գլխավորությամբ:

Կողմերը քննարկեցին փոխադարձ հետաքրքրություն ներկայացնող հարցեր, կարևորվեց երկկողմ հարաբերությունների ակտիվ և դինամիկ զարգացումը, ՀՀ-ԵՄ համագործակցության շարունակականությունը, Արևելյան գործընկերության հետագա հնարավորությունները:

Հյուրի խնդրանքով անդրադառնալով Հայաստանի' Մաքսային միությանը և Եվրասիական տնտեսական միությանը միանալու որոշումից հետո ՀՀ-ԵՄ հարաբերություններին՝ Արտակ Զաքարյանը նշեց, որ Հայաստանը, ակտիվորեն աշխատելով Եվրասիական տնտեսական միությանը միանալու ուղղությամբ, նաև փորձում է շարունակել զարգացնել երկկողմ և բազմակողմ համագործակցությունը եվրոպական տարբեր երկրների հետ, այդ թվում՝ Նիդեռլանդների Թագավորության: Պարոն Զաքարյանը նշեց, որ ՌԴ-ն ՀՀ ռազմավարական գործընկերն ու դաշնակից պետությունն է, և Հայաստանը շարունակելու է զարգացնել իր հարաբերությունները ՌԴ-ի հետ: Նշվեց, որ ՀՀ-ն վարում է հավասարակշռված արտաքին քաղաքականություն՝ ելնելով տարածաշրջանում առկա բազմաթիվ խնդիրներից և անվտանգության ապահովման անհրաժեշտությունից: Այդ համատեքստում ՀՀ-ն կարևորում է նաև համագործակցությունը ԵՄ-ի հետ:

Ըստ պարոն Զաքարյանի՝ ՀՀ-ն փորձելու է ապագայում կամրջող դեր ունենալ տնտեսական տարբեր միությունների միջև: Խոսելով Ուկրաինայում տեղի ունեցող զարգացումներից՝ պարոն Զաքարյանը նշեց, որ դրանք բացասաբար են անդրադառնում Արևելյան գործընկերության, ինչպես նաև Հարավային Կովկասի տարածաշրջանի վրա՝ մեծացնելով լարվածությունը ԼՂ հիմնախնդրի կարգավորման հարցում և հույս հայտնեց, որ խնդիրը հնարավոր կլինի կարգավորել խաղաղ երկխոսությունների ճանապարհով:

ԱԺ պատգամավոր Մհեր Շահգելդյանը իր տեսակետը ներկայացրեց հանդիպման ընթացքում քննարկված հարցերի վերաբերյալ: Նա նաև խոսեց հայ-թուրքական հարաբերություններից՝ նշելով, որ Թուրքիայի հետ սահմանի բացման ուղղությամբ ՀՀ կատարած քայլերին Թուրքիան բացասաբար է արձագանքել:

Նույն օրը Նիդեռլանդների Թագավորության խորհրդարանի Ներկայացուցիչների պալատի պատգամավոր, «Ազատություն և ժողովրդավարություն» ժողովրդական կուսակցության ԵՄ հարցերով պատասխանատու Մարկ Ֆերհայենի գլխավորած պատվիրակության հետ հանդիպեց նաև ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը:

Հյուրի խնդրանքով հանձնաժողովի նախագահը ներկայացրեց Եվրոպական միության և Եվրասիական տնտեսական միության հետ Հայաստանի հարաբերությունների ներկա վիճակը։ Անդրադառնալով միջխորհրդարանական կապերի զարգացմանն ու խորացմանը՝ Նաիրա Զոհրաբյանն ընդգծեց, որ, ցավոք, Նիդեռլանդների և Հայաստանի միջխորհրդարանական կապերը բավականին թույլ են՝ նշելով, որ խորհրդարանական դիվանագիտությունը շատ ավելի ճկուն է և կարող է իրեն թույլ տալ միշտ մեկ քայլ առաջ լինել պաշտոնական դիվանագիտությունից: Կողմերը պայմանավորվեցին առավել ակտիվացնել խորհրդարանական կապերը: Նաիրա Զոհրաբյանը նշեց, որ հասկանում է Նիդեռլանդների լուրջ տնտեսական շահերն ու հետաքրքրությունները Ադրբեջանում, սակայն արձանագրեց, որ որևէ «նավթային կամ խավիարային» հետաքրքրություն չպետք է առավել բարձր լինի մարդու իրավունքների հիմնարար արժեքներից: Նա ցավ հայտնեց, որ նույն ԵԽ-ում հոլանդացի որոշ պատգամավորներ Ադրբեջանի ակտիվ լոբբիստներից են, և իրենց պատվավոր տեղն ունեն Ադրբեջանի «խավիարակերների» շարքում:

Կողմերը քննարկեցին նաև ԼՂ խնդիրը, ինչպես նաև տարածաշրջանային ու ներքաղաքական այլ խնդիրներ: Նաիրա Զոհրաբյանը խնդրեց հոլանդացի պատգամավորի միջամտությունը նիդեռլանդական Ալմելո քաղաքում հայկական հիմնական դպրոց բացելու հարցում: