Իրանից Հայաստանով գազ տարանցելու համար անհրաժեշտ է փոխել գազամուղի խողովակաշարերը. Իրանի դեսպան

Հայաստանի տարածքով էներգակիրների տարանցման համար անհրաժեշտ է համապատասխան ենթակառուցվածք, որը կապված է մեծ ներդրումների ու ժամանակի հետ: Հայաստանում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսիի գնահատմամբ' գազամուղի կառուցման համար անհրաժեշտ է 3-4 միլիարդ դոլարի ներդրում: Սա գրեթե նույնքան է, որքան մեկ երկաթգծի կառուցումը:

«Արմենպրես»-ի փոխանցմամբ, հրավիրված ասուլիսում դեսպանը կարծիք հայտնեց, որ Իրանից դեպի Հայաստան գազ տարանցելու միակ խնդիրն այն է, որ Հայաստանի տարածքով էներգակիրների տարանցման համար անհրաժեշտ է համապատասխան տրամաչափի խողովակաշար: «Երբ նախագծվեց Հայաստան-Իրան գազամուղը, գուցե այդ ժամանակվա համար այն հարմար է եղել, բայց այժմ հարմար չէ, քանի որ այդ տրամաչափի խողովակներով հնարավոր չէ տարանցում իրականացնել»,- ասաց դեսպանը:

Անդրադառնալով Իրանի նախագահ Հասան Ռուհանիի՝ Հայաստան այցելությանը, դեսպանն ասաց, որ այցն անպայման կկայանա, սակայն ժամկետները հստակ չեն: «Հստակ հնարավոր չէ ժամկետ նշել՝ հաշվի առնելով նախագահի աշխատանքային գրաֆիկը, որը բավականին ծանրաբեռնված է: Բայց Իրանի նախագահի այցը տեղի կունենա գուցե այս տարվա ընթացքում՝ մեր օրացույցով՝ մինչև մարտի 20-ը»,- ասաց նա:

Մոհամմադ Ռեյիսին նշեց, որ այսօր տարածաշրջանում չափազանց բարդ իրավիճակ է ստեղծվել. «Մեր տարածաշրջանում այնպիսի իրավիճակ է ստեղծվել, որտեղ առկա են բազմաթիվ խնդիրներ, որոնց լուծման համար անհրաժեշտ է ոչ միայն տարածաշրջանի, այլ նաև դրսում գտնվող ուժերի համախմբումը»: