Հայ-ռուսական կազմակերպությունները համակարգող խորհրդի հայտարարությունը Լևոն Հայրապետյանի ազատազրկման հետ կապված

Հայ-ռուսական կազմակերպությունները համակարգող խորհուրդը հայազգի գործարար և բարերար Լևոն Հայրապետյանի ազատազրկման հետ կապված հանդես է եկել հայտարարությամբ: Ինչպես «Արմենպրես»-ը տեղեկանում է գործարարի facebook-յան պաշտոնական էջից, հայտարարության մեջ ասված է, որ տարիներ շարունակ Հայրապետյանը հանդիսանում է խոշոր մեկենաս, ում աջակցությամբ զարգանում և ամրապնդվում է հայկական համայնքը, Հայաստանի և Լեռնային Ղարաբաղի հանրապետությունները:

«Նրա շնորհիվ հարյուրավոր մարդիկ աշխատանք են գտել, նա ամենաակտիվ ջանքերն է գործադրել ՌԴ տնտեսության զարգացման համար և բազմաթիվ ներդրողների հրավիրել Ռուսաստան: Հայրապետյանի լայնածավալ հասարակական գործունեությունը նպաստում է հայ-ռուսական դարավոր բարեկամության ամրապնդմանը: Նա շատ մեծ դեր է խաղում Հայաստանում և ԼՂՀ-ում ռուսական մշակույթի պրոպագանդայի հարցում: Բացի այդ, Լևոն Հայրապետյանը հանդիսանում է Հայաստանի՝ Եվրասիական միության անդամակցության ամենակտիվ ջատագովներից մեկը: Հենց նրա ազդեցության շնորհիվ է, որ ինտեգրացիոն ճանապարհին առկա բազմաթիվ խոչընդոտներ վերացել են: Լևոն Հայրապետյանը հանդիսանում է խոշոր միջազգային լոբբիստ, որ պայքարում է Օսմանյան կայսրությունում Հայոց ցեղասպանության փաստի ճանաչման համար: Ունենալով լայն կապեր ամբողջ աշխարհում, նա միշտ առաջ է տարել հայ ժողովրդի շահը, սակայն երբեք չի վնասել Ռուսաստանի կամ որևէ այլ երրորդ երկրի շահերին»,- ասված է հայտարարության մեջ:

Համակարգող խորհուրդը կոչ է արել Ռուսաստանի դատական և իրավապահ մարմիններին, գործի ընթացքում հաշվի առնել նաև օրենքով տրված մարդասիրական վերբերմունքը նման արժանավոր մարդու հանդեպ: «Լևոն Հայրապետյանը լուրջ հիվանդ է, նա առաջին կարգի հաշմանդամ է, վերջերս է ծանր վիրահատություն տարել Գերմանիայում և նրա կյանքն ու առողջությունը վտանգված են»,- ասված է խորհրդի հաղորդագրությունում:

Հաջակցություն Լևոն Հայրապետյանի՝ ելույթ է ունեցել նաև Համաշխարհային հայկական կոնգրեսի և Ռուսաստանի հայերի միության նախագահ Արա Աբրահամյանը, ով հավաստիացրել է, որ Հայրապետյանը հանցավոր ոչինչ չի կատարել: Աբրահամյանի խոսքով՝ Հայրապետյանի գործն իրենց ուշադրության կենտրոնում է և նրանք անընդհատ կապ են հաստատում, թե իրավապահ մարմինների, թե Հայրապետյանի փաստաբանի հետ: Աբրահամյանը նշել է, որ իրենք վստահ են՝ Հայրապետյանն անմեղ է, սակայն գործի քննության համար կպահանջվի ժամանակ, որպեսզի ուսումանսիրվեն բոլոր փաստերը: