Սևանի՝ ահռելի չափերի հասնող աղտոտվածությունը սպառնալիք է լճի էկոհամակարգի և լողորդների համար

Սևանա լճի ստորջրյա ավազանի գիտահետազոտական արշավ իրականացնող խմբի անդամներն ահազանգում են լճում հավաքված ահռելի ծավալի կենցաղային աղբի մասին: «Արմենպրես»-ի փոխանցմամբ, հուլիսի 25-ին լրագրողների հետ հանդիպմանը Ստորջրյա հետազոտությունների եւ սուզումների հայկական կենտրոնի (ՍՀՍԿ) փոխնախագահ Արա Ավագյանը նշեց, որ լճի հատակին մեծ քանակությամբ լքված ցանցեր, անգամ անվադողեր, պլաստմասե շշեր են թափված, որը լուրջ վնաս է հասցնում էկոլոգիային, խանգարում շարժունակությանը, ինչպես նաև վտանգում լողորդների կյանքը:

«Այս տարի կենտրոնի նախաձեռնությամբ Սևանի ավազանի հատակի մոտ 100 քառակուսի մետր փոքր տարածքի մաքրում է իրականացվել: Ընդամենը 20 րոպեի ընթացքում դուրս է բերվել մեծ ծավալի աղբակույտ, ինչը ցույց է տալիս, որ շատ խիստ է էկոլոգիական խնդիրը: Աղտոտվում են ոչ միայն Սևանի ավազանի ափամերձ տարածքները, այլև ստորջրյա ավազանը»,- ասաց Ավագյանը:

Հինգ տարում ՍՀՍԿ-ին հաջողվել է ուսումնասիրել Սևանի ավազանի մի փոքր հատված միայն: Ավագյանն ընդգծեց, որ այդ առումով դեռ հսկայական աշխատանք կա անելու:

Մինչ կենտրոնի ստեղծումը շատ քիչ հետազոտություններ և ստորջրյա սուզումներ են իրականացվել Սևանում, որի ավազանը ՀՀ տարածքի մոտ տասը տոկոսն է զբաղեցնում: Կենտրոնը պատրաստ է համագործակցել շահագրգռված գիտական հաստատությունների հետ, մասնագիտական և տեխնիկական ծառայություններ մատուցել հետազոտություններ իրականացնելու համար: