Ադրբեջանի իշխանության մեջ կասկածներ են ի հայտ եկել Էլմար Մամեդյարովի և նրա շրջապատի նկատմամբ

Ադրբեջանի խորհրդարանի պատգամավոր, «Միացյալ Ադրբեջանի ժողովրդական ճակատ» կուսակցության առաջնորդ Գուդրաթ Հասանգուլիևի' օրերս արած հայտարարությունն այն մասին, որ երկրի արտաքին գերատեսչության ղեկավար Էլմար Մամեդյարովը «ադրբեջանական ներկայիս կառավարության կազմում ամենաանկարող նախարարներից մեկն է և պետք է հրաժարական տա», ինչպես նաև դեսպանների հասցեին հնչեցրած քննադատությունն, առաջացրել է հակառակ կողմի զայրույթը:

Ինչպես հաղորդում է «Արմենպրես»-ն, ըստ «Ազադլիգ»-ին հասած տեղեկությունների' Էլմար Մամեդյարովն ու արտոնյալ մի քանի դեսպաններ ցանկացել են անմիջապես պատասխանել պատգամավորին, սակայն, նախագահի աշխատակազմը սաստել է նրանց և հասկանալ տվել, որ անհրաժեշտ է հարցը լուծել անաղմուկ:

Թերթը նշում է, որ Էլմար Մամեդյարովն ու նրա շրջապատը կարծում են, որ պատգամավորը նման հայտարարությամբ հանդես է եկել արտակարգ իրավիճակների նախարար Քեմալադդին Հեյդարովի գլխավորած «նախիջևանյան կլանի» հանձնարարությամբ, որը ցանկանում է վերահսկողություն սահմանել երկրի արտաքին քաղաքականության վրա: Լուրեր են շրջանառվում, որ հակառակ կողմն այնքան է համառել, որ տեղի ունեցածը քննարկվել է իշխանության գագաթաժողովում: Նշվում է, որ «հակառակ կողմին ավելի շատ զայրացրել է Գուդրաթ Հասանգուլիևի կողմից Էլմար Մամեդայրովին հայ գործընկերոջ' Էդվարդ Նալբանդյանի հետ համեմատելը և վերջինիս նախապատվություն տալը»: Էլմար Մամեդյարովն ու նրա շրջապատը հարցի քննակման ժամանակ դա գնահատել են «որպես իշխանության արտաքին քաղաքականությանը հասցված լուրջ հարված»:

Հիշեցնենք, որ Գուդրաթ Հասանգուլիևը, մի քանի օր առաջ կոչ անելով հրաժարական տալ զբաղեցրած պաշտոնից, Էլմար Մամեդյարովի հասցեին սուր արտահայտություններ էր օգտագործել: «Նրա պահվածքից բռնած մինչև արած հայտարարություններն ու դեսպանատները ղեկավարելու ունակությունը' ոչ մի բան տեղում չէ: Այդ մարդու արտաքինից մինչև նրա հայտարարությունները ոչ մեկին դուր չեն գալիս»,- ասել էր նա:

Նշելով, որ ինքն անձամբ Ադրբեջանի ԱԳՆ ղեկավարի անձի նկատմամբ ոչ մի խնդիր չունի, Հասանգուլիևն ասել էր. «Պարզապես ցանկանում եմ ասել' նրան կարելի է Բաքվում մի այլ աշխատանքի նշանակել: Բայց այս բնագավառում, որպես կառավարության ամենաանհաջող նախարարներից մեկը, նա պետք է փոխարինվի»:

Պատգամավորն ընդգծել էր, որ դեսպանների մեծ մասը ևս իրենց տեղում չեն գտնվում: «Մեր դեսպանների մեծ մասը ևս նախարարի պես իրենց տեղում չգտնվող մարդիկ են: Եվրոպայում մեր որոշ դեսպաններ դեսպանատների շենքերն օգտագործում են սեփական բիզնեսը ստեղծելու նպատակների համար: Նրանցից շատերն այնքան անկարող են, որ Ադրբեջանի մասին ճշմարտությունները չեն կարողանում իրենց գործունեության երկրների ոչ թե առաջատար, անգամ միջին մակարդակի մամուլում հրապարակել»,- նշել էր պատգամավորը: