Լեհաստանը Ադրբեջանին կոչ է արել կատարել ԵԽ-ի, ԵԱՀԿ-ի եւ ՄԱԿ-ի առաջ ստանձնած պարտավորությունները

Լեհաստանի կառավարությունը Ադրբեջանում վերջին ռեպրեսիաների հետ կապված բողոքի հայտարարություն է հրապարակել:

Ինչպես հաղորդում է «Արմենպրես»-ը' վկայակոչելով «Ազադլըգ» թերթը, հայտարարության մեջ ասվում է. «Լեհաստանի արտաքին գործերի նախարարությունը խստորեն անհանգստացած է Ադրբեջանում քաղաքացիական հասարակության ակտիվիստների քաղաքական դրդապատճառներով ձերբակալությունների առնչությամբ: Մենք առանձնապես սարսափած եւ տագնապած ենք փաստաբան եւ իրավապաշտպան Ինթիգամ Ալիեւի, Լեյլա եւ Արիֆ Յունուսների, Հասան Հուսեյնլիի, Ռասուլ Ջաֆարովի, լրագրող Ռաուֆ Միրկադիրովի, ինչպես նաեւ ընդդիմադիր կուսակցությունների բազմաթիվ ակտվիստների եւ նրանց ընտանիքների անդամների դեմ ռեպրեսիաներով: Մեզ լրջորեն անհանգստացնում են քաղաքական դրդապատճառներով ձերբակալությունների եւ կալանավորումների ժամանակ օգտագործվող անհիմն մեղադրանքները: Սեփական քաղաքացիների դեմ հիմնարար իրավունքների եւ ազատությունների խախտումները անկայունություն եւ սոցիալական լարվածություն են ծնում: Դա նաեւ լրջորեն խոչընդոտում է Եվրոպայի հետ համագործակցությանը: Մենք Ադրբեջանի իշխանությանը կոչ ենք անում վերջ դնել քաղաքացիական ակտվիստների, ընդդիմադիր քաղաքական գործիքների եւ նրանց ընտանիքների անդամների դեմ բռնաճնշումներին, ինչպես նաեւ կյանքի կոչել Եվրոպայի Խորհրդի, ԵԱՀԿ-ի եւ ՄԱԿ-ի առաջ ստանձնած պարտավորությունները»: