Սահակաշվիլիին առաջադրվել է բյուջետային միջոցների վատնման մեղադրանք

Վրաստանի Գլխավոր դատախազությունը ևս մեկ մեղադրանք է առաջադրել նախկին նախագահ Միխեիլ Սահակաշվիլիին, այս անգամ նա մեղադրվում է բյուջետային միջոցների վատնման մեջ, տեղեկացնում է «Արմենպրես»-ը:

Խոսքը վերաբերում է Սահակաշվիլիի հանձնարարությամբ Վրաստանի պետական պահպանության հատուկ ծառայության ավելի քան 8,8 միլիոն լարիի (շուրջ 5 միլիոն դոլարի) վատնմանը: Դատախազությունը պնդում է, որ այդ փողը ծախսվել է խոհարարի, մերսորդուհու ծառայությունների, այն հյուրանոցների համար, որտեղ բնակվել են օտարերկրացի հյուրեր, Իտալիայում զբոսանավի վարձակալման և այլ նպատակներով:

«Սահակաշվիլին քրեական պատասխանատվության է ենթարկվում բյուջետային միջոցների վատնման գործով»,- հայտարարել են Գլխավոր դատախազությունում կայացած ճեպազրույցում

Հանցանքի հաստատման դեպքում Սահակաշվիլիին սպառնում է 7-ից մինչև 11 տարվա ազատազրկում:

Սահակաշվին և ևս չորս նախկին պետական պաշտոնյաներ 2007 թվականի նոյեմբերի 7-ի ակցիայի ցրման, «Իմեդի» հեռուստաընկերության ավերման և այժմ հանգուցյալ Բադրի Պատարկացիշվիլիի ունեցվածքի ապօրինի զավթման գործի ֆիգուրանտներ են: Նրանց մեղադրում են պաշտոնեական լիազորությունների վերազանցման մեջ, Վրաստանի Քրեական օրենսգրքի համապատասխան հոդվածը նախատեսում է մինչև 8 տարի ժամկետով ազատազրկում: