Գերմանիայի օմբուդսմենը իրավաբանորեն չհիմնավորված է համարել Ադրբեջանում իրավապաշտպաններ Լեյլա և Արիֆ Յունուսների ձերբակալությունը

Գերմանիյաի կառավարության մարդու իրավունքների մարդասիրական օգնության գծով հատուկ ներկայացուցիչ (օմբուդսմեն) Քրիստոֆ Շտրասերը հանդես է եկել Ադրբեջանում իրավապաշտպաններ Լեյլա և Արիֆ Յունուսների ձերբակալության հետ կապված հայտարարությամբ: Հայտարարության մեջ Գերմանիայի օմբուդսմենը Ադրբեջանից պահանջել է անհապաղ ազատ արձակել իրավապաշտպան ամուսիններին և նշել, որ Լեյլա և Արիֆ Յունուսներին որպես կասկածյալներ հետաքննության ենթարկելը իրավաբանորեն հիմնավորված չէ:

Ինչպես հաղորդում է «Արմենպրես»-ը՝ վկայակոչելով ադրբեջանական ԶԼՄ-ները, Շտրասերի հայտարարությունը գերմանական մամուլում հրապարակվելուց անմիջապես հետո Գերմանիայում Ադրբեջանի դեսպանատունը շտապել է հայտնել, որ գերմանական ԶԼՄ-ների կողմից տարածվող այդ տեղեկավությունը, իբրև, «օբյեկտիվ չէ» և անընդունելի է:

Քրիստոֆեր Շտրասերի՝ Գերմանիայի օմբուդսմեն նշանակվելու փաստը Բաքվում խիստ դժգոհությամբ է ընդունվել: Մինչ այդ պաշտոնին նշանակվելը Ք. Շտրասերը Եվրոպայի խորհրդի խորհրդարանական վեհաժողովում եղել է Ադրբեջանում մարդու իրավունքների գծով զեկուցողը: Ք. Շտրասերը բազմիցս հանդես է եկել Ադրբեջանում մարդու իրավունքների ոտնահարումները քննադատող հայտարարություններով: Ադրբեջանական կավարությունը երկար ժամանակ Շտրասերին թույլ չի տվել այցելել Բաքու՝ տեղում իրավիճակին ծանոթանալու և քաղաքական բանտարկյալներին հանդիպելու համար: «Խավիարային դիվանագիտության» արդյունքում Բաքվին հաջողվել է կասեցնել ԵԽԽՎ-ում քաղբանտարկյալների գծով Ադրբեջանին դատապարտող բանաձևի ընդունումը, ինչից հետո Շտրասերը հրաժարական է տվել զեկուցողի պաշտոնից:

Ադրբեջանի իշխանությունները երկյուղում են, որ Շտրասերին Գերմանիայի օմբուդսմենի պաշտոնում նշանակումը կարող է նոր լարվածություն առաջացնել երկու երկրների հարաբերություններում, քանի որ նա շարունակում է ադրբեջանական իշխանությունների հասցեին հանդես գալ խիստ քննադատությամբ: