IHBARI-ն առաջարկում է ԵԽ նախարարների խորհրդի արտահերթ նիստում քննարկել Ադրբեջանի հարցը

Իրավաբանների միջազգային ասոցիացիայի մարդու իրավունքների ինստիտուտը (IBAHRI) Եվրոպայի խորհրդի նախարարների հանձնաժողովին կոչ է արել անմիջապես միջոցներ ձեռնարկել Ադրբեջանի քաղաքացիական հասարակության ներկայացուցիչների ձերբակալությունների մտահոգիչ միտման կապակցությամբ: Ինչպես հաղորդում է «Արմենպրես»-ը, այս մասին նշվում է IBAHRI-ի պաշտոնական կայքում:

Կազմակերպությունը հաստատակամորեն պնդում է, որ ԵԽ գլխավոր քարտուղարը հրավիրի արտակարգ նիստ՝ քննարկելու Ադրբեջանում իրականացված վերջին ձերբակալությունները: IBAHRI-ի համանախագահ Հելենա Քենեդին պարադոքսալ է համարում այն, որ Ադրբեջանի քաղաքացիական հասարակության ներսում նման դրամատիկ իրադարձություններ են նկատվում հենց այն ժամանակ, երբ երկիրը ստանձնել է ԵԽ նախարարների հանձնաժողովի նախագահությունը: «Եվրոպայի խորհրդի ժողովրդավարական արժեքները և Մարդու իրավունքների եվրոպական համաձայնագրի երաշխավորված ազատությունները քարոզելու փոխարեն Ադրբեջանը ոչնչացնում է դրանք: Երկիրն ունի ինչպես ներքին, այնպես էլ միջազգային պարտավորվածություններ՝ պաշտպանելու մարդու հիմնարար իրավունքները, ինչպիսին է խոսքի ազատությունը: Բացարձակապես անընդունելի է այն, որ Ադրբեջանի իշխանությունները այսպես կոպտորեն խախտում են հիմնարար իրավունքները»,- ասել է Քենեդին:

2013 թվականին Ադրբեջան այցելած IBAHRI-ի պատվիրակությունը արձանագրել էր, որ երկրում քրեական օրենքներն օգտագործվում են վարչակազմի քննադատներին լռեցնելու համար: 2014 թվականի մայիսին պատրաստած զեկույցում արձանագրվեց, որ քաղաքացիական հասարակության շատ ներկայացուցիչներ քաղաքական հետապնդումների են ենթարկվում:

Իրավապաշտպան IHBARI կազմակերպությունը նշում է, որ թեպետ Ադրբեջանը տնտեսապես զարգանում է, սակայն այդ ամենը չի համապատասխանեցվում ժողովրդավարական արժեքների ինստիտուտի՝ մարդու իրավունքների պաշտպանության զարգացման հետ: IHBARI-ն կոչ է անում Ադրբեջանի իշխանություններին կատարել իր պարտավորությունները սեփական ժողովրդի նկատմամբ՝ հետևելով օրենքի գերակայությանը: