Բաքվում վահաբական աղանդի հետևորդը դանակահարել է ավտոբուսի երկու ուղևորներին

Անցյալ երեկոյան Բաքվի «Նեֆթչիլյար» մետրոյի կայարանի մոտ վիճաբանություն է տեղի ունեցել սալաֆիական (վահաբի) համայնքի ներկայացուցչի և երկու երիտասարդ մարդկանց միջև, որն ավարտվել է դանակահարությամբ:

Ինչպես հաղորդում է «Արմենպրես»-ը` վկայակոչելով milli.az լրատվական կայքը, միջադեպի երեք մասնակիցները գտնվել են միևնույն երթուղային ավտոբուսում: 24-ամյա Հիլալ Բեջանովը և 21-ամյա Հայալ Բայրամովը կրոնական թեմայով զրույցի ընթացքում անընդհատ կրկնել են «բիսմիլլահ» (հանուն Ալլահի) բառը: Դա դուր չի եկել վահաբական ուղևորին և նա երիտսարդներից պահանջել է իջնել ավտոբուսից: Նրանց հետևից իջել է նաև ինքը, անմիջապես դանակահարել երկուսին էլ և փախուստի դիմել:

Փաստի առնչությամբ քրեական գործ է հարուցվել: Իրավապահները որոնում են հանցագործին:

Ադրբեջանում հաճախակի են դարձել իսլամիստ ծայրահեղականների` սալաֆիների և չափավոր սունիների ու շիաների միջև բախումները:

Ադրբեջանական minval.az լրատվական կայքն ավելի վաղ հայտնել էր, որ Ադրբեջանում վահաբիզմը գնալով երիտասարդության ավելի մեծ շրջանակներ է սկսել ընդգրկել: Ըստ կայքի` սունի իսլամի այդ ծայրահեղ աղանդի հետևորդների թիվն Ադրբեջանում անցնում է 50 հազարը: Նշվում է, որ վահաբիզմը երիտասարդ ադրբեջանցիների մեջ հանրամատչելիություն է ձեռք բերում ծանր տնտեսական պայմանների, գործազրկության, կյանքի բոլոր ոլորտները ներթափանցած կոռուպցիայի, Ադրբեջանի բնակչության ունեցվածքային շերտավորման պատճառով: «Եթե բնակչության հիմնական զանգվածը լյումպենացվում է, ապա մյուս բևեռում տեղի է ունեցել անցյալում չտեսնված նյութական միջոցների համակենտրոնացում»,- գրել էր կայքը: