Թուրքիայի նորընտիր նախագահ Էրդողանը Twitter-ը համեմատել է մարդասպանի դանակի հետ

Թուրքիայի նորընտիր նախագահ Ռեջեփ Թայիփ Էրդողանը, ով մինչ այժմ շարունակում է պաշտոնավարել նաև որպես այդ երկրի վարչապետ և իշխող «Արդարություն և զարգացում» կուսակցության առաջնորդ, նոր կատաղի գրոհ է սկսել սոցիալական մեդիայի վրա` Twitter-ում like-երը համեմատելով «վիրաբույժի ձեռքում եղած հերձադանակի» և «մարդասպանի ձեռքի դանակի» հետ: Այս մասին, ինչպես հաղորդում է «Արմենպրես»-ը, հայտնում է Islam Today-ը:

Էրդողանը, ով Twitter-ին ավելի վաղ անվանել էր «հանգստության խախտող» այն բանի համար, որ անցյալ տարի ամռանն օգտագործվել էր իր կառավարության դեմ փողոցային բողոքի ակցիաներ կազմակերպելու համար, սոցիալական մեդիան մեղադրել է թմրանյութերի առևտրում հանցակցության մեջ, հայտնում է Islam Today-ը:

Էրդողանի կառավարությունը մարտին արգելափակել էր Twitter և YouTube սոցիալական կայքերը այն բանից հետո, երբ դրանք օգտագործվել էին իր և իր մերձավորների` դեկտեմբերին բացահայտված կոռուպցիոն սկանդալին մասնակցություն ունենալու ապացույցներ պարունակող տեսա- և ձայնագրություններ տարածելու համար: Սոցիալական մեդիան ամբողջությամբ արգելափակելու մասին Էրդողանի որոշումը հետագայում չեղյալ էր ճանաչվել սահմանադրական դատարանի կողմից, որը որոշել էր, որ տվյալ դեպքում խոսքի ազատության խախտում է տեղի ունեցել: