Թուրքիայում հրդեհել են Աթաթուրքի կիսանդրին (տեսանյութ)

Թուրքիայի քրդաբնակ տարածաշրջանի կենտրոն Դիարբեքիրի նահանգի Լիջե քաղաքում թուրքական ժանդարմերիայի և բնակիչների միջև երեկ տեղի ունեցած բախումից հետո, որի ժամանակ սպանվել էր 24-ամյա քաղաքացի Մեհդի Թաշքընը, մի խումբ քրդեր հրդեհել են «Անատոլու» ուսումնարանի բակում տեղադրված Աթաթուրքի կիսանդրին: Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները:

Քուրդ երիտասարդը սպանվել, ևս երկու քրդեր վիրավորվել էին Լիջեի Յոլաչթը գյուղում թուրքական զինված ուժերի և Քուրդիստանի աշխատավորական կուսակցության զինյալների միջև 1986 թվականին տեղի ունեցած բախումներում զոհված քուրդ հրամանատար Մահսում Քորքմազի արձանն ապամոնտաժելու դեմ բողոքի ակցիայի ժամանակ, որը օրեր առաջ տեղադրվել էր զոհված քուրդ զինյալների գերեզմանատանը: Ժամդարմերիան գործել էր թուրքական դատարանի ընդունած որոշման համաձայն, որով վճռվել էր քանդել արձանը:

Երիտասարդի սպանության դեմ բողոքող քրդերի խումբը քաղաքի կենտրոնական փողոցների տների պատերին գրել է «Լիջեի ժողովուրդը մենակ չէ» գրություն: Հետո նրանք գնացել են ուսումնարանի շենքի մոտ գտնվող Աթաթուրքի արձանի մոտ, բենզին լցրել վրան, հրդեհել, այնուհետև ջարդել այն: «Այսօր մենք այսպես լուծեցինք մեր համերկրացու սպանության վրեժը», -հայտարարել են նրանք:

Միջադեպի վայր ժամանած ոստիկանությունը արցունքաբեր գազ է օգտագործել բողոքի ակցիայի մասնակիցների դեմ, որոնք նրանց պատասխանել են «մոլոտովյան կոկտեյլներով» և քարերով:

Քուրդ հրամանատարի արձանը քանդելու և երիտասարդի սպանության հետ կապված Թուրքիայի քրդաբնակ շրջաններում բողոքի ակցիաներ են սկսվել: Թուրքական իրավապահների հետ բախումներ են տեղի ունեցել Հաքքարիում, Դիարբեքիրում և Վանում: Լիջեի բախումներում սպանվել է թուրքական ժանդարմերիայի ենթասպա Ուղուր Ունալը:

Թուրքական ԶԼՄ-ները Լիջեում տեղի ունեցած բախման հետ կապված հրապարակել են թուրք զինվորի` հերոսի տապալված արձանի գլխին ոտքը դրած պատկերով լուսանկարներ:

Թուրքիայի քրդական «Դեմոկրատական տարածաշրջանների կուսակցությունը» (DBP) Մահսում Քորքմազի արձանի ապամոնտաժման կապակցությամբ տարածած հայտարարության մեջ նշել է, որ արձանը քանդելու տեսարանը քրդերին հիշեցրել է «1990-ականներին տեղի ունեցած թուրք-քրդական պատերազմը, երբ թուրքական ԶԼՄ-ները հրապարակում էին զոհված քրդերի գլխին թուրք զինվորի ոտքը դրած լուսանկարներ»: «Թուրքիայի մտածողությունը քրդական հարցում որևէ փոփոխության չի ենթարկվել այս 25 տարում», -նշել է DBP-ն: