Արտադրության և առևտրի ցանցում թռչնամսի ստուգում են իրականացրել

ՀՀ գյուղատնտեսության նախարարության Սննդամթերքի անվտանգության պետական ծառայությունը և Թռչնաբույծների միությունը հանրապետությունում հուլիսի վերջին իրականացրել են հավի մսի ստուգումներ: Թռչնաբույծների միության նախագահ Սերգեյ Ստեփանյանի խոսքով՝ նման ուսումնասիրությունները նպատակն ունեին արտադրության և առևտրի ոլորտում ուսումնասիրել թռչնամիսը, և պարզել՝ արդյոք այն համապատասխանում է ստանդարտներին:

«Արդյունքները պատրաստ են: Փորձաքննության համար վերցրել էինք բոլոր խոշոր ֆաբրիկաների նմուշները: Ութ թռչնաֆաբրիկաներից 5-ական տարբեր տեսակների ցուցանմուշներ ենք փորձարկել: Ի ուրախություն մեզ՝ դրանք անվնաս են եղել»,- «Արմենպրես»-ի փոխանցմամբ՝ նշեց Ստեփանյանը:

Անդրադառնալով այն փաստին, որ ձեռներեց Էդվարդ Մխիթարյանն օրերս ոչ պիտանի և քիմիական նյութերով մշակված հավի միս էր մատակարարել Նոր Նորքի թիվ 101, 116 և 118 մանկապարտեզներին, Սերգեյ Ստեփանյանն ընդգծեց, որ դեպքը քննության փուլում է:

«Պարզ է, որ մենք «Ալավերդու թռչնաֆաբրիկա» չենք ունեցել, նման ֆաբրիկա գոյություն չի ունեցել: Մեզ էլ է հետաքրքիր, թե որտեղից հայտնվեց նման միս և նման արտադրող»,- նշեց Թռչնաբույծների միության նախագահը:

Ստեփանյանի խոսքով՝ նման փորձաքննությունները կշարունակվեն, որպեսզի արտադրողները չխախտեն սպառողների շահերը:

«Հայաստանի սպառողների ասոցիացիա» ՀԿ-ի նախագահ Արմեն Պողոսյանն իր զարմանքն արտահայտեց այն հարցի առնչությամբ, թե ինչպես կարող է մանկապարտեզում հայտնվել կասկածելի սնունդ: «Եկել ենք ահազանգելու, որ փորձաքննության արդյունքները դեռ չկան»,-նշեց նա:

ՀՀ ոստիկանություն օպերատիվ տեղեկություններ էին ստացվել, որ «Ե.Է.Ռ.ԸՆԴ.ՔՈ» սահմանափակ պատասխանատվությամբ ընկերության հիմնադիր-տնօրեն և անհատ ձեռներեց Էդվարդ Մխիթարյանը Երևանի Դուշանբեի 11/8 հասցեում կազմակերպել է հավի մսի մշակման և փաթեթավորման գործունեություն, որտեղ քացախի, կալիումի պերմանգանատի և այլ քիմիական նյութերի միջոցով մշակվում է անհայտ ծագում ունեցող, փչացած, օգտագործման համար ոչ պիտանի հավի միս: Օգոստոսի 11-ին ոստիկանության ԿՀԴՊ ԳՎ կոռուպցիայի և տնտեսական գործունեության դեմ ուղղված հանցագործությունների հակազդման վարչության և Նոր Նորքի բաժնի աշխատակիցների իրականացրած օպերատիվ-հետախուզական միջոցառումների արդյունքում առգրավվել են «Ալավերդու թռչնաֆաբրիկա» ապրանքանիշով և արտադրության ամսաթվերի վերաբերյալ կասկածելի տվյալներով հավի մսի խմբաքանակներ:

Արտադրամասի զննությամբ հայտնաբերվել են փչացած հավի միս, վերամշակման համար նախատեսված քիմիական տարբեր նյութեր ու դատարկ տարաներ, որոնք վերցվել են հետագա հետազոտությունների համար: Էդվարդ Մխիթարյանը և նրա գործընկեր Գոռ Արզումանյանը, առաքման համար շահագործվող «ՎԱԶ-2121» մակնիշի ավտոմեքենայով հանդերձ բերման են ենթարկվել ոստիկանություն: Շուրջ 10 տոննա նմանատիպ հավի միս էլ հայտնաբերվել է Փարաքարում և «Արմենիա միջազգային օդանավակայաններ» ՓԲԸ բեռնային համալիրում գտնվող' Մխիթարյանի կողմից վարձակալված պահեստարաններում:

Միջոցառումներին ներգրավվել են նաև գյուղատնտեսության նախարարության Սննդամթերքի անվտանգության ծառայության մասնագետներ:

Փչացած հավի մսի վերականգնման, ապրանքային տեսքի բերելու մեխանիզմը նոր չէ: Նման հանցավոր գործունեություն ծավալվել ու կասեցվել է նաև այլ երկրներում: Պարզվել է, որ Էդվարդ Մխիթարյանը ոչ պիտանի հավի միս է մատակարարել Նոր Նորքի թիվ 101, 116 և 118 մանկապարտեզներին: Հետաքննությունը շարունակվում է: