Ադրբեջանում խանդով են արձագանքել Էրդողանի երդմնակալությանը ՀՀ նախագահին հրավիրելուն. «Ազադլըգ»

Հայ-թուրքական հարաբերություններում որևէ դրական դրսևորում անմիջապես հիստերիա է առաջացնում Ադրբեջանում: Այդ երկրում խանդով են արձագանքել նաև Թուրքիայի նորընտիր նախագահ Ռեջեփ Թայիփ Էրդողանի երդմնակալության արարողությանը մասնակցելու համար Հայաստանի Հանրապետության նախագահ Սերժ Սարգսյանին արված հրավերին:

Ինչպես հաղորդում է «Արմենպրես»-ը' վկայակոչելով «Ազադլըգ» թերթը, առաջին բացասական արձագանքն Ադրբեջանի իշխող «Ենի Ազերբայջան» կուսակցությունն արել է խորհրդարանի իր պատգամավոր Այդըն Միրզազադեի միջոցով: Վերջինս Facebook-ի իր էջում գրել է. «Նորընտիր նախագահի երդմնակալության արարողությանը Հայաստանի նախագահ Սերժ Սարգսյանին ևս հրավիրելու լուրը վրդովեցրել է Թուրքիայի բարեկամներին: Թուրքերի թշնամուն պետական տոնին հրավիրելու պատճառը հասկանալի չէ: Պարզ չէ, թե Հայաստանի ղեկավարին հրավիրելով Էրդողանի երդմնակալությանը' ինչ է ուզում ձեռք բերել Թուրքիան»:

Թերթը գրում է, թե ակնհայտ է, որ այդ արձագանքն Այդըն Միրզազադեի սեփական ինքնագործունեությունը չէ: «Ադրբեջանի իշխանության ներկայացուցիչների անկախ դիրքորոշում ցուցադրելու փորձ Ադրբեջանում գոյություն չունի: Այդ պատճառով, նրա այդ դիրքորոշումը պետք է հասկանալ որպես իշխանության վերաբերմունք: Ամենայն հավանականությամբ, այդ հարցի հետ կապված իշխանական ճամբարից ավելի խիստ հայտարարություններ կհնչեն, ինչը չի կարող ազդեցություն չթողնել Անկարայի և Բաքվի միջև հարաբերությունների վրա», -եզրակացնում է թերթը:

Հետաքրքիր է, որ չնայած Էրդողանի երդմնակալության արարողությանը մասնակցելու համար ցանկություն են հայտնել թյուրքական գրեթե բոլոր պետությունների ղեկավարները, Ադրբեջանը որոշել է ներկայանալ պետության երրորդ դեմքի' խորհրդարանի խոսնակի մակարդակով:

«Ազադլըգ»-ի հետ զրույցում Ժողովրդական ճակատ կուսակցության փոխնախագահ Ֆուադ Գահրամանլըն ուշագրավ մեկնաբանություն է տվել եղբայրական պետության' առաջին անգամ ժողովրդի կողմից ընտրված նախագահի երդմնակալության արարողությանը Իլհամ Ալիևի նման վերաբերմունքին: Նա զարմանք է հայտնել, որ Թուրքիայի հետ «ռազմավարական հարաբերությունների» մեջ գտնվող Ադրբեջանը նման կարևոր իրադարձությանը ներկայանում է ոչ առաջին դեմքի մակարդակով:

«Դա Թուրքիայի նկատմամբ Ադրբեջանի իշխանության ունեցած իրական վերաբերմունքի դրսևորումն է: Չնայած երկու երկրների ռազմավարական դաշնակցությանը, ադրբեջանական իշխանությունը մինչ այժմ չի կարողացել յուրացնել այդ մտածողությունը: Երկու ռազմավարական դաշնակիցների միջև մինչ այժմ վերացված չէ վիզային ռեժիմը: Միևնույն ժամանակ երկու երկրների միջև չլուծված բազմաթիվ խնդիրներ կան: Ցավալի է, որ Ադրբեջանի արտաքին քաղաքականության մեջ Թուրքիայի համար մինչ այժմ եղածից տարբերվող կերպար չկա: Այդ մոտեցումը Բաքուն ցուցադրում է նաև երդմնակալության արարողության նկատմամբ ունեցած վերաբերմունքով»,- ասել է Գահրամանլըն:

Թուրքիայի նորընտիր նախագահի երդմնակալության արարողությանը Հայաստանի պաշտոնապես հրավիրված լինելու մասին նախագահ Սերժ Սարգսյանը հայտարարել է «Միասին-2014» ֆորումի մասնակիցների հետ հանդիպման ժամանակ: