Թուրք սահմանապահները ջիհադականներին Սիրիա են անցկացնում 10 դոլար կաշառքի դիմաց. Daily Mail

Ամեն օր Թուրքիայից Սիրիա են անցնում 20-ից ավելի ջիհադականներ: Թուրք սահմանապահները նրանց Սիրիա են թողնում անցնել 10 դոլար կաշառքի դիմաց: Այս մասին, ինչպես հաղորդում է «Արմենպրես»-ը, հայտնում է անգլիական Daily Mail թերթը:

Թերթի թղթակից Սեմ Գրինհիլը պարզելու համար, թե ինչպես են իսլամիստ ահաբեկիչները Թուրքիայի վրայով անցնում Սիրիա, մեկնել է թուրք-սիրիական սահմանամերձ Այնթապի և Հաթայի շրջաններ և տեղում բացահայտել «Իրաքի և Լևանտի իսլամական պետություն» (ԻԼԻՊ) ահաբեկչկան խմբավորման կազմը թուրքական կողմից համալրելու իրողությունը:

Գրինհիլը գրում է, որ տարբեր երկրներից ժամանած ջիհադականները Թուրքիայի տարածքով հանգիստ կերպով անցնելով Սիրիա' միանում են ԻԼԻՊ-ին:

Նրա խոսքով, սահմանում թուրք զինվորները հազվադեպ են երևում: Սահմանապահները 10 դոլար կաշառքի դիմաց աչք են փակում այն բանի վրա, որ Սիրիա են անցնում ջիհադականներ, որոնք սահմանը հատելուց 48 ժամ հետո ԻԼԻՊ-ի ղեկավարների կողմից ընդունվում են ջիհադական ուսուցման ճամբաներ:

Գրինհիլը, ով թուրք-սիրիական սահմանակետերը անվանում է «Ջիհադի դուռ» կամ «Ջիհադի էքսպրես», հայտնում է, որ ամեն օր այդ սահմանակետերով 20-ից ավելի իսլամիստ մարտիկներ են անցնում Սիրիա և միանում ԻԼԻՊ-ին և այլ ահաբեկչական խմբավորումների: