Լիբիան հակադարձել է Էրդողանին. «Հաբերլեր»

Լիբիայի արտաքին գործերի նախարարությունը Թուրքիայի նախագահ Ռեջեփ Թայիփ Էրդողանին մեղադրել է երկրի ներքին գործերին միջամտելու մեջ: Այս մասին, ինչպես հաղորդում է «Արմենպրես»-ը, հայտնում է թուրքական «Հաբերլեր» լրատվական կայքը:

Նշվում է, որ «Ալ Ջազիրա» հեռուստաալիքին տված հարցազրույցում Թուրքիայի նորընտիր նախագահ Էրդողանը Լիբիայի խորհրդարանի' երկրի արևելյան հատվածում' Թոբրուքում արտակարգ նիստ գումարելու հետ կապված հայտարարել է, որ «դա անհնարին է ընդունել»: Լիբիայի արտաքին գործերի նախարարությունն այդ առնչությամբ հայտարարել է, որ Էրդողանի այդ արտահայտությունը «միանգամայն անընդունելի է», և այն որակել որպես «բացահայտ միջամտություն Լիբիայի ներքին գործերին»: «Մենք Անկարայից պաշտոնական բացատրություն ենք սպասում այն մասին, որ Էրդողանի այդ արտահայտությունը նրա սեփական, թե՞ երկրի պաշտոնական տեսակետն է», -ասվում է Լիբիայի ԱԳՆ գրավոր հայտարարության մեջ:

Չնայած այն բանին, որ Լիբիայի գերագույն խորհրդի նախագահ Նուրի Էբու Սեհմենը ցանկություն էր հայտնել հրաժեշտի նիստը գումարել մայրաքաղաք Տրաբլուսում, այդ երկրի նորընտիր խորհրդարանի պահանջով այն անցկացվել է Թոբրուքում, որին մասնակցել են նաև Արաբական լիգայի, Եվրոպայի, Աֆրիկայի պետությունների առաջնորդներ և այդ երկրի նոր սահմանադրությունը պատրաստող հանձնաժողովի անդամները: