«ԼՂՀ ապագան». Արգենտինական պարբերականը հրապարակել է հայ և արգենտինացի գործիչների նամակը

Լեռնային Ղարաբաղի մասին Արգենտինայում Ադրբեջանի դեսպան Մամեդ Ահմազադեի հոդված-նամակն առաջացրել է տեղի հայ մտավորականության և արգենտինացի հասարակության դժգոհությունը: Դեսպանի նամակը տպագրվել է Արցախի անկախության օրը Բուենոս Այրեսի The Nation պարբերականում, ինչին հաջորդել է նույն պարբերականում հայ և արգենտինացի գործիչների «Լեռնային Ղարաբաղի Հանրապետության ապագան» խորագրով պատասխան նամակի հրապարակումը: Ինչպես հաղորդում է «Արմենպրես»-ը' վկայակոչելով PrensaArmenia.com-ը, Արգենտինայում, Չիլիում, Ուրուգվայում և Պարագվայում Հայաստանի դեսպան Վահագն Մելիքյանը հիշեցրել է, որ 1988թ. փետրվարի 20-ին, իրավական բոլոր նորմերին համապատասխան, ԼՂԻՄ մարզխորհրդի 20-րդ գումարման նստաշրջանում որոշում կայացվեց դիմել Ադրբեջանական ԽՍՀ, Հայկական ԽՍՀ և ԽՍՀՄ Գերագույն խորհուրդներին' մարզը Ադրբեջանի կազմից դուրս բերելու և Հայաստանի կազմի մեջ ընդգրկելու մասին:

«Արցախի ինքնորոշման քաղաքակիրթ քաղաքական որոշումը հանգեցրեց Ադրբեջանի իշխանությունների զայրույթին և նրանք սկսեցին սպանել Սումգայիթում ապրող հայ քաղաքացիներին: Նրանք հետապնդում և վախեցնում էին Ադրբեջանի տարածքում ապրող կես միլիոն հայերին: Այս անգամ էլ Ադրբեջանի ձեռքով իրականացվող նոր ցեղասպանությունից խուսափելու համար Լեռնային Ղարաբաղի ժողովուրդը պատրաստվեց ինքնապաշտպանության և տարավ հաղթանակ ադրբեջանական բանակի դեմ հանուն պատմական տարածքների պահպանման և հանուն այնտեղ ապրող մարդկանց»,- գրել է Մելիքյանը' ևս մեկ անգամ հիշեցնելով, որ 1991թ. սեպտեմբերի 2-ին Լեռնային Ղարաբաղի Հանրապետությունը հռչակվեց անկախ: Բունեոս Այրեսի համալսարանի իրավաբանական ֆակուլտետի միջազգային իրավունքի դասախոս Ռոբերտո Մալխասյանն էլ գրել է, որ Ղարաբաղի հայերը ինքնորոշվել են համաձայն միջազգային իրավունքի բոլոր նորմերի: «Ինչ վերաբերում է տարածքային ամբողջականությանը, որի մասին խոսում է ադրբեջանցի դեսպանը, ապա հենվելով Հաագայի միջազգային դատարանի եզարափակիչ որոշման վրա, որը վերաբերում է Կոսովոյի անկախությանը, կարող ենք փաստել, որ այս սկզբունքը չի կարող գործածվել Ղար աբաղի պարագայում»,- գրել է նա:

Քաղաքագետ, Klarin թերթի խմբագիր Ֆաբիան Բոսոերն էլ անդրադարձել է ազգերի ինքնորոշման խնդրին' փաստելով, որ դա լուրջ սկզբունք և կարևորագույն հարց: Տարածքային ամբողջականության մասին գրելով, Բոսոերը հիշատակել է 20-րդ դարի առաջին' Հայոց ցեղասպանությունը, որը դեռևս չի ճանաչվել Թուրքիայի կողմից և չի պահպանվել տարածքային ամբողջականության սկզբունքը: Քաղաքագետն անդրադարձել է ԼՂՀ-ում ժողովրդավարության մակարդակին' շեշտելով, որ 2012թ. կայացած նախագահական ընտրություններն իրենց պատրաստվածությամբ և քաղաքակրթությամբ կարող էին օրինակ ծառայել բա զմաթիվ պետությունների համար: