Ծովագյուղում անասնագլխաքանակի պահպանման քայլեր են ձեռնարկվելու

Գեղարքունիքի մարզի Ծովագյուղ համայնքում մոտ 90 տոկոսով արդեն ավարտվել է անասնակերի կուտակումը' համեմատաբար նվազ բերքատվության պայմաններում: Ինչպես «Արմենպրես»-ին տեղեկացրեց Ծովագյուղի գյուղապետ Վահրամ Գեւորգյանը, գյուղի տնտեսությունները մոտ 900 հեկտար բնական խոտհարքերից կարողացել են հավաքել մոտ 1100 տոննա խոտ: Ցանովի խոտհարքերից եւ այլ վայրերից ծովագյուղցիները կարողացել են անասունների համար ձմեռացման պաշար հավաքել' անասնակերի քանակությունը հասցնելով մոտ 3100 տոննայի:

«Կուտակված անասնակերն առայժմ անբավարար է' գյուղի տնտեսություններում պահվող 3 հազար 534 գլուխ խոշոր եւ 1,4 հազար գլուխ մանր եղջերավոր անասունների ձմեռացումն ապահովելու համար: Ուստի, տնտեսությունները փորձում են պակասը լրացնել այլ տեղերից անասնակեր գնելով կամ հավաքելով ու տեղափոխելով, որպեսզի կարողանան անկորուստ դուրս գալ անասունների մսուրային շրջանից»,- հավաստեց համայնքի ղեկավարը: Նրա կարծիքով' վերջին տարիների ընթացքում անասնագլխաքանակը գյուղում նկատելիորեն ավելացել է' դառնալով տնտեսությունների համար եկամտի կայուն աղբյուր , ուստի, յուրաքանչյուրը ձգտելու է պահպանել ու զարգացնել եղած անասնագլխաքանակը, որքան էլ որ անասնակերն այս տարի սակավ է ստացվել:

Խոսրով Խլղաթյան