Սեմյոնովկայում գտել են խմելու ջրի հիմնախնդրի լուծումը

Գեղարքունիքի մարզի Սեմյոնովկա համայնքում աստիճանաբար կարգավորվում է խմելու ջրի մատակարաման, միաժամանակ' կառավարման հիմնախնդիրը: Դա հնարավոր դարձավ այս տարվա ընթացքում, երբ համայնքի ղեկավարի եւ ավագանու որոշումների արդյունքում, խմելու ջրի մատակարման համակարգը փոխադարձ պայմանավորվածությամբ, հանձնվեց «Հայջրմուղկոյուղի» ՓԲԸ կառավարմանը:

Ինչպես «Արմենպրես»-ին տեղեկացրեց Սեմյոնովկայի գյուղապետ Դավիթ Մնացականյանը, այս տարվա մայիսից «Հայջրմուղկոյուղի» ՓԲԸ միջոցներով կառուցվել է խմելու ջրատարի 2,6 կիլոմետր երկարության արտաքին ցանց, որը օրերս կշահագործվի' միացվելով օրվա կարգավորիչ ջրամբարին:

«Վայրկյանում 2 լիտր ջրի հոսքը լիուլի կբավարարի գյուղի բնակչության կարիքները, եւ բոլոր տներում մեզ կհաջողվի իրականացնել շուրջօրյա ջրամատակարարում»,-նշեց համայնքի ղեկավարը:

Եկող տարվա գարնանից նույն «Հայջրմուղկոյուղի» ՓԲԸ ներդրումներով կսկսվի գյուղի ներքին ցանցի հիմնանորոգումը. ձանցի ընդհանուր երկարությունը կազմում է մոտ 3 կիլոմետր: Դրանից հետո յուրաքանչյուր սպառման կետում կտեղադրվեն ջրաչափեր, եւ համակարգը կշահագործվի առանց ջրի կորուստերի եւ շռայլումների: Մոտ օրերս լուծում կստանա նաեւ գյուղի հիմնական դպրոցի եւ բուժկետի ջրամատակարման հարցը:

Խոսրով Խլղաթյան