Էրդողանը Թուրքիային հեռացնում է աշխարհիկ անցյալից. Financial Times

Թուրքիայի նախագահ Ռեջեփ Թայիփ Էրդողանը երկիրը հեռացնում է աշխարհիկ անցյալից: Էրդողանը կրոնական հայեցակարգ է որդեգրել և մերժում է Օսմանյան կյասրության փլուզումից հետո յուրացրած ավանդույթները: Այս մասին, ինչպես հաղորդում է «Արմենպրես»-ը, գրում է անգլիական Financial Times թերթը:

Թերթն ընդգծում է, որ Թուրքիայի պատմության մեջ առաջին անգամ համաժողովրդական քվեարկությամբ նախագահ ընտրված Էրդողանը երդմնակալությունից մեկ շաբաթ չանցած շարունակում է երկիրը դեպի իսլամ տանող վարչապետության օրոք որդեգրած քաղաքականությունը: Թերթը գտնում է, որ անցյալից կտրվելու Էրդողանի առաջին խորհրդանշական քայլը Թուրքիայի Հանրապետության հիմնադիր Աթաթուրքի և նախկին 11 նախագահների համար նստավայր ծառայած Չանքայա պալատից հրաժարումն է:

Թերթը թվարկում է Էրդողանի կողմից նախկինում արած՝ «հավատացյալ սերունդ աճեցնելու և դաստիարակելու» մասին հայտարարության և 2012 թվականին կատարած օրենսդրական փոփոխության արդյունքները՝ նշելով, որ դրանից հետո թուրք երեխաները 10 տարեկանում հաճախում են կրոնական վարժարաններ, որոնց թիվը 2011 թվականից հետո 73 տոկոսով աճել է Թուրքիայում:

Թերթը նշում է, որ Էրդողանի համար որպես նախագահական նստավայր կառուցվող շենքը դրսից հիշեցնում է սելջուկյան, ներսից՝ օսմանյան մշակույթի նմուշ: Թերթը հեգնանքով նշում է նաև, որ հիշելով Թուրքիայի իմպերիալիստական անցյալը, Էրդողանը իր նոր նստավայրը ԱՄՆ-ի Սպիտակ տան օրինակով կոչել է «Սպիտակ պալատ»: