Ըստ Բառոզուի` Եվրոպայում նոր սառը պատերազմը ոչ մեկի շահերից չի բխում. BBC

Համաշխարհային Մամուլ 9 Սեպտեմբեր, 2014 21:27

Եվրամիությունը մտադիր է Ռուսաստանի հետ համագործակցել Ուկրաինայի արևելքում հակամարտության քաղաքական կարգավորման հասնելու համար: Այդ մասին, ինչպես տեղեկացնում է «Արմենպրես»-ը, հայտարարել է Եվրահանձնաժողովի նախագահ Ժոզե Մանուել Բառոզուն բրիտանական BBC կորպորացիային տված հարցազրույցում, որը եթերում ցուցադրվել է սեպտեմբերի 9-ին:

Բառոզուի խոսքով՝ եվրոպայում նոր սառը պատերազմը չի համապատասխանում որևէ մեկի շահերին: Նա հավաստիացրել է, որ ԵՄ-ն մտադիր է համագործակցել Ռուսաստանի հետ Ուկրաինայի արևելքում հակամարտության քաղաքական կարգավորման հասնելու համար:

«Մեզ համար պատժամիջոցները ինքնանպատակ չեն, այլ երկխոսությունը շարունակելու միջոց: Մենք կարծում ենք, որ պետք է գտնվի քաղաքական լուծում՝ լիովին պահպանելով Ուկրաինայի ինքնիշխանությունն ու ամբողջականությունը»,- ասել է Բառոզուն:

«Կարծում եմ, որ Եվրոպայում նոր սառը պատերազմը ոչ մեկի շահերից չի բխում»,- հայտարարել է Եվրահանձնաժողովի ղեկավարը, հաղորդել է ԻՏԱՌ-ՏԱՍՍ-ը:

ԵԱՀԿ-ի մշտական խորհրդի նախագահ, Շվեյցարիայի մշտական ներկայացուցիչ Թոմաս Գրեմինգերը նախօրյակին հայտնել է, որ Ուկրաինայում հրադադարը հիմնականում պահպանվում է:

«Ընդհանուր առմամբ հրադադարի ռեժիմը պահպանվում է, թեև այն դեռևս փխրուն բնույթ է կրում»,- ասել է նա: Գրեմինգերի խոսքով՝ «հաջորդ մի քանի օրերը վճռորոշ կլինեն»: Նա նաև նշել է, որ ներկայում Ուկրաինայում են գտնվում այդ կազմակերպության 250 դիտորդներ:

The Wall Street Journal ամերիկյան թերթը հայտնել է, որ Ռուսաստանի նկատմամբ Եվրամիության նոր պատժամիջոցները նախատեսում է ռուսական այն ընկերությունների թվաքանակի ավելացում, որոնք չեն կարողանա միջոցներ փոխառնել կապիտալի շուկաներում:

Հրատարակության տեղեկությունների համաձայն՝ պատժիչ ցուցակում կներառվեն ՌԴ երեք հիմնական պետական նավթընկերությունները՝ «Գազպրոմ նեֆտը», «Տրանսնեֆտը» և Ռոսնեֆտը: Բացի այդ, պետության կողմից վերահսկվող հինգ բանկերի համար, որոնց ներկայում արգելված է աշխատել մարման ավելի քան 90 օր ժամկետով եվրոպական փոխառու գործիքներով, այդ ժամկետը կկրճատվի մինչև 30 օր: Խոսքը վարկային հիմնարկությունների մասին է, որոնց նկատմամբ ԵՄ-ն պատժամիջոցներ է սահմանել հուլիսի վերջին, դրանք են՝ Սբերբանկը, Ռոսսելխոզբանկը, Գազպրոմբանկը, Վնեշէկոնոմբանկը և ՎՏԲ-ն: Նախատեսված են սահմանափակիչ այլ միջոցառումներ, մասնավորապես, պաշտպանության բնագավառում: