«Թուրքիայի оրհներգի երաժշտության հեղինակը հայ է». HaberTurk

Թուրքական HaberTurk հեռուստաալիքի «Պատմության հետին սենյակը» ծրագրի հեղինակ Մուրադ Բարդաքչըն պատմել է աշխարհահռչակ շանսոն Շառլ Ազնավուրի` ազգությամբ հայ լինելու մասին և ցուցադրել նրա կատարմամբ հանրահայտ երգի տեսահոլովակ:

Ինչպես հաղորդում է «Արմենպրես»-ը, երգի հնչելուց հետո ծրագրի ինտերնետային հասցեին և հաղորդավարի հեռախոսահամարին ունկնդիրները հաղորդագրություններ են ուղարկել և դժգոհել հայերեն երգ հնչեցնելու համար:

Դրան ի պատասխան Բարդաքչըն ուղիղ եթերում հայտարարել է, որ հաջորդ շաբաթ ևս 2 հայերեն երգ է հնչեցնելու: Միաժամանակ նա ասել է. «Որևէ երգից կամ երգչից վախենալը չի սազում Թուրքիային: Ի՞նչ է` մի երգը կարող է երկի՞ր քանդել: Եթե պետությունն այնքան խղճուկ է, որ պետք է մեկ երգով քանդվի, ուրեմն թող քանդվի»:

Թուրք հաղորդավարը իրենից դժգոհող հեռուստադիտողներին հիշեցրել է, որ Թուրքիայի Հանրապետության պետական оրհներգի երաժշտության հեղինակը ազգությամբ հայ կոմպոզիտոր Էդգար Մանասն է: «Դե որ այդպես է` Թուրքիայի պետական հիմնը ևս մի երգեք ու մի հնչեցրեք», -ասել է նա:

Այդ անմիտ դժգոհությունից խիստ զայրացած թուրք հաղորդավարը հաղորդման ժամանակ ծրագրի տեխնիկական կազմին կարգադրել է մեկ անգամ ևս հեռարձակել Ազնավուրի երգը: