«Մուսա լեռան 40 օրը» գրքի հեղինակն այսօր կդառնար 124 տարեկան. Haaretz-ի անդրադարձը

Հրեական ծագումով ավստրիացի դրամատուրգ և նովելիստ Ֆրանց Վերֆելը, ով իր հեղինակած և Հայոց ցեղասպանության մասին պատմող «Մուսա լեռան 40 օրը» աշխատությամբ կարծես նախազգուշացնում էր աշխարհին ծագող նացիստական վտանգի մասին, այսօր կդառնար 124 տարեկան: Ինչպես հաղորդում է «Արմենպրես»-ը, իսրայելական Haaretz պարբերականն «Այս օրը հրեական պատմության մեջ» խորագրի ներքո հատուկ հոդված է հրապարակել՝ նվիրված հեղինակի կյանքին և գործունեությանը:

Հոդվածում հատուկ տեղ է հատկացված «Մուսա լեռան 40 օրը» աշխատությանը: Ներկայացվում է, որ Վերֆելն առաջին անգամ հայերի հետ կատարվածին ծանոթացել է պատահաբար՝ Դամասկոսում: Արդյունքում նա հեղինակել է 1915 թվականին թուրքերի կողմից հայերի դեմ իրականացված ոճրի մասին պատմող վեպը, որն աննախադեպ վաճառք է գրանցել: Նա ընթերցողներին գիրքը ներկայացրել է իբրև մի պատմություն, թե ինչպես «աշխարհի ամենահին և պատկառելի ժողովուրդներից մեկը ջախջախվեց, սպանվեց և գրեթե ոչնչացվեց... իրենց իսկ համերկրացիների կողմից»: Պարբերականը պատահական չի համարում այն, որ «Մուսա լեռան 40 օրը» գիրքն առաջիններից էր, որ ֆաշիստներն այրեցին խարույկների վրա:

Ֆրանց Վերֆելը մահացավ 1945 թվականի օգոստոսի 26-ին՝ 54 տարեկանում: