«Ռուսաստանն ահաբեկումների պատճառով չի փոխի քաղաքականությունը». The Atlantic

Արևմտյան ղեկավարները, հատկապես ամերիկացիները, պետք է փորձեն հասկանալ Ռուսաստանին և ընդունեն այն փաստը, որ դա այն երկիրը չէ, որին կարելի է ահաբեկումների միջոցով ստիպել փոխելու իր քաղաքականությունը: Այդ մասին, ինչպես տեղեկացնում է «Արմենպրես»-ը, գրել է The Atlantic-ի լրագրող Ջեֆրի Թեյլերը:

«Իրադրությունը, որում մենք հայտնվել ենք, մեծապես պայմանավորված է արևմտյան ղեկավարների մի մասի, հատկապես ԱՄՆ-ի՝ Ռուսաստանին հասկանալու փորձի ձախողմամբ, իսկ դա, այնուամենայնիվ, հարկ է, որ նրանք փորձեն անել՝ հաշվի առնելով նրա ռազմավարական կարևորությունը, միջուկային զինանոցը, մայրցամաքային մասշտաբները, բնական ռեսուրսները»,-գրում է Թեյլերը:

Հեղինակը հավելում է, որ ներկայիս լարվածությունը կապված է նաև այն բանի հետ, որ Արևմուտքը չի ցանկանում ընդունել Ռուսաստանի արևմտյան սահմանների մոտ ՆԱՏՕ-ի բազաների ծավալման կապակցությամբ Ռուսաստանի անհանգստությունը:

Կուբայում ԽՍՀՄ-ի բազաների տեղաբաշխումից հետո ծագած նմանօրինակ առճակատումն ավարտվեց գործարքով, որն անհրաժեշտ է նաև այժմ, նշում է լրագրողը: «Բայց ինչ-որ բան կնքելու համար արևմտյան ղեկավարները պետք է վերանայեն Ռուսաստանի նկատմամբ իրենց տեսակետը և քաղաքականությունը, շարունակել է նա:

Ռուսաստանն այն երկիրը չէ, որին ահաբեկման միջոցով կարելի է ստիպել փոխելու քաղաքականությունը, նշում է The Atlantic-ի լրագրողը: Դա մի երկիր է, որը չափազանց շատ բան է վերապրել, ուստի տնտեսական պատժամիջոցների սպառնալիքները «դատարկ հնչյուն են» ռուսների ականջների համար, ընդհակառակը, դրանք միայն ամրապնդում են Վլադիմիր Պուտինի աջակցությունը բնակչության կողմից:

Թեյլերի համոզմամբ՝ կայուն խաղաղության հասնելու միակ հնարավորությունը ՆԱՏՕ-ի և ԱՄՆ-ի կողմից Ուկրաինային չեզոքություն առաջարկելն է և գրավոր ձևով խոստում տալը, որ նրան չեն ընդունի ՆԱՏՕ, հաղորդել է ՌԻԱ Նովոստին: