ՀՅԴ-ն առաջարկում է կարգավորել վարկերի տրամադրման գովազդների խնդիրները

Ազգային ժողովի ՀՅԴ խմբակցությունն առաջարկում է կարգավորել վարկերի տրամադրման մասին գովազդների հետ կապված խնդիրները, որոնք անցանկալի հետևանքներ են ունենում քաղաքացիների համար:

«Արմենպրես»-ի հաղորդմամբ՝ Ազգային ժողովի քառօրյա նիստերի օրակարգ է ընդգրկվել «Գովազդի մասին» ՀՀ օրենքում լրացում կատարելու մասին օրենքի նախագիծը, որով առաջարկվում է սահմանել հետևյալ ձևակերպումը: «Եթե վարկի տրամադրման, օգտվելու կամ մարման վերաբերյալ գովազդային ծառայությունները՝ անկախ գովազդի տեղադրման վայրից, պարունակում են վարկի արժեքի վրա ազդող թեկուզ մեկ պայման' տոկոսների չափի կամ վարկի տրամադրման ու մարման հետ կապված որևէ այլ վճարի կամ ծախսի մասին, ապա այդպիսի գովազդը պետք է պարունակի բոլոր մնացած պայմանները, որոնք որոշում են վարկի փաստացի արժեքը (վարկի ընդհանուր գումարը, տոկոսը, այն ստանալու և մարելու համար կատարվող ծախսերը)»:

Որպես հիմնավորում նշվում է այն հանգամանքը, որ ներկայումս վարկերի տրամադրման մասին գովազդներում ներկայացվում են հայտարարություններ, առաջարկներ և պայմաններ, որոնք ոչ միշտ են արտացոլում վարկի տրամադրման, օգտվելու և մարման փաստացի արժեքը՝ վարկի ընդհանուր գումարը, տոկոսը և այն ստանալու համար կատարվող բոլոր ծախսերը: Իսկ դա վարկառուին զրկում է իր նախնական հաշվարկները կատարելու, իրեն հարմար բանկ կամ վարկային կազմակերպություն ընտրելու հնարավորությունից:

Մյուս կողմից' հայտարարվում է մի տոկոսադրույք, որն իր բնույթով լինելով վարկի արժեքը, հաճախ իր մեջ չի ներառում վարկի ստացման, սպասարկման և մարման համար կատարվող ծախսումները, ինչի արդյունքում վարկառուի համար վարկի արժեքը մեծանում է, որը հաճախ հանգեցնում է անցանկալի հետևանքների' ներառյալ անվճարունակությունը և անհարկի ծախսումների պահանջի ձևավորումը:

Նշվում է, որ այս իրավիճակը նմանվում է ոչ հավաստի տեղեկատվությամբ ապրանքների և ծառայությունների ձեռք բերմանը, իսկ հաճախ նաև' անբարեխիղճ գովազդի դրսևորմանը: Մինչդեռ գովազդի մասին օրենքը պահանջում է, որպեսզի գովազդը լինի հավաստի և բարեխիղճ: Ինչպես ամրագրված է հիշյալ օրենքի 7-րդ հոդվածում, գովազդի հավաստիությունը վերաբերում է նաև ապրանքների և ծառայությունների վճարման լրացուցիչ պայմաններին, իսկ 21-րդ հոդվածի համաձայն, արգելվում է հրապարակել անբարեխիղճ գովազդը: Ընդ որում, գովազդն անբարեխիղճ է, եթե, օրինակ, ապակողմնորոշում է իրավաբանական և ֆիզիկական անձանց, քանի որ լիարժեքորեն չեն ներկայացվել ապրանքի կամ ծառայության առանձնահատկությունները, գինը և այլ անհրաժեշտ տեղեկատվությունը:

Օրինագծով առաջարկվում է նաև սահմանել, որ ֆինանսական և վարկային ծառայությունների ոլորտում գովազդի մասին օրենքի կատարման նկատմամբ վերահսկողությունը վերապահվելու է ՀՀ կենտրոնական բանկին, ինչպես մասնագիտական, այնպես էլ կազմակերպչական նկատառումներից ելնելով:

Օրինագիծը մշակել են ՀՅԴ խմբակցության պատգամավորներ Արծվիկ Մինասյանը և Աղվան Վարդանյանը, ինչպես նաև խմբակցության փորձագետները: