Ոչխարների առեղծվածի բացահայտումը

ԱԺ Գյուղատնտեսական և բնապահպանական հարցերի մշտական հանձնաժողովում այսօր քննարկման դրվեցին Գյուղատնտեսության և Բնապահպանության նախարարություններում Վերահսկիչ պալատի 2013 թվականին արված ուսումնասիրության արդյունքները:

Քննարկման ընթացքում անդրադարձ կատարվեց «էդիլբայ» տեսակի տոհմային ոչխարներ Հայաստան ներկրելու հարցին:

ՎՊ նախագահ Իշխան Զաքարյանի խոսքով՝ «Արալեռ ՏՈՏ» ընկերությունը 2012 թվականին նախատեսում էր 900 գլուխ «էդիլբայ» տեսակի տոհմային ոչխար ներկրել, գումարը 90 մլն դրամ:

«Իրենց բիզնես ծրագրի համաձայն՝ 2012 թվականին գրված է՝ ներմուծվել է 900, 2013 թվականին՝ 450, միասին 1350՝ երկու տարվա կտրվածքով: Ներդրման նպատակը տոհմային ոչխարաբուծությունն է. ծրագրով նախատեսվում է 2012-2013 ձեռք բերել 1350 գլուխ «էդիլբաև» տեսակի ոչխար: Մենք բերում ենք միայն փաստեր, որոնք ներկայացված են ձեր ծրագրով, բիզնես պլանով, և ըստ այդ ծրագրի, 2012-2013թթ պետք է ձեռք բերվեր 1350 գլուխ ոչխար: Պայմանագիրը կնքվել է 2012 թվականին, յոթ տարի ժամկետով, հատկացված միջոցները` 90 մլն դրամ ներդրում, 160 մլն դրամ փոխառություն: Պայմանները՝ պետությունը 7 տարի ժամկետով ստանում է 44,27% բաժնետոմս, պայմանագրի ժամկետը լրանալուց հետո հիմնադրամն օտարում է իր բաժնետոմսերն ընկերության բաժնետերերին: 2013-2018 թվականների ընթացքում ընկերությունը պետք է ներդնողներին վճարեր շահութաբաժին՝ նվազագույնը 13.5 մլն դրամ յուրաքանչյուր տարվա համար»,- ասաց Զաքարյանը և ներկայացրեց իր նամակն ուղղված ՊԵԿ նախագահին:

«ՎՊ նախագահը ՊԵԿ-ի նախագահին նամակ է գրել, որպեսզի տեղեկացնի՝ 2012 և 2013 թվականների ընթացքում «էդիլբայ» տեսակի ոչխար ընդհանրապես Հայաստան ներկրվե՞լ է, թե՞ ոչ: Պատասխանը՝ 2012 և 2013 թվականներին դուք որևէ ոչխար չեք տեսնի Հայաստան ներմուծված: Երբ վերահսկողությունն իրականացնող հանձնաժողովի նախագահը զեկուցեց խորհրդին, որ «Արալեռ ՏՈՏ» ընկերությունն «էդիլբայ» տեսակի ոչխար չի բերել, ես հարց բարձրացրի, որ հնարավոր է ինքն ուրիշից գնած լինի. ստուգեցինք նաև դա: Ստացել ենք պաշտոնական տեղեկատվությունը, «Արալեռ ՏՈՏ» ընկերությունը Բագրատաշեն անցակետով Վրաստանից ներմուծել է 74 հորթ: Այնուամենայնիվ, մենք, վստահելով ծրագրի ղեկավարին, ով մեզ տեղեկանք էր տվել, որ ամեն դեպքում 366 այդ տեսակի ոչխար անցել է, մենք հետազոտել ենք խնդիրը լրացուցիչ, և պարզվել է հետևյալը, որ ընկերությունը 366 ոչխար անցկացրել է սահմանը, սակայն մինչև օրս մաքսազերծված չեն, երկրորդը՝ ՊԵԿ-ը հայցադիմումով դիմել է դատարան, որպեսզի այդ մաքսազերծումը դարձնեն օրինական: Վարչական դատարանի որոշմամբ՝ ընկերությունը պարտավորվում է, որպեսզի նրանք գնան և մաքսազերծեն այդ ոչխարները»,- ասաց Իշխան Զաքարյանը: