Արարատի մարզում մթերվել է ավելի քան 70 հազար տոննա խաղող

Արարատի մարզի խաղող մթերող գործարանները, հոկտեմբերի 1-ի տվյալներով, ընդհանուր առմամբ մթերել են ավելի քան 70 հազար տոննա խաղող: Ինչպես «Արմենպրես»-ին տեղեկացրեց Արարատի մարզպետարանի աշխատակազմի գյուղատնտեսության և բնապահպանության վարչության պետ Հայկազ Տերտերյանը, մարզում գտնվող 19 խաղող մթերող գործարաններից այս տարի մթերում են իրականացնում 15-ը' սկսած 100 դրամից( «Շահումյան Վին» ՍՊԸ' մինչև 170 դրամ, «Վեդի Ալկո» ՍՊԸ-ն մթերումն իրականացվում է տարբեր գներով' կախված խաղողի տեսակից և որակից եւ այլն): Մարզի երեք գործարաններից յուրաքանչյուրում մթերվել է 10000 տոննայից ավելի խաղող: Երևանի կոնյակի գործարանը մթերել է 14276 տոննա, Երևանի կոնյակի, գինու, օղու կոմբինատը' 14 243 տոննա, Պռոշյանի կոնյակի գործարանը' 12 239 տոննա: Տերտերյանն ասաց, որ նշված ցուցանիշներին շուտով կմոտենա նաև Արարատի գինու գործարանը:

Վարչության պետն ասաց, որ Արարատի մարզպետ Ռուբիկ Աբրահամյանի անմիջական մասնակցությամբ պարբերաբար հանդիպումներ են կազմակերպվել մթերող գործարանների տնօրենների հետ՝ փոխշահավետ մթերում կազմակերպելու նպատակով:

Նախորդ տարի մարզում արտադրված խաղողը մթերվել է հիմնականում Երևանի կոնյակի գործարանի, Երևանի կոնյակի, գինու կոմբինատի Մասիսի մասնաճյուղի, Արարատի գինու գործարանի, Պռոշյանի կոնյանի գործարանի, Երասխի գինու գործարանի կողմից՝ 1 կգ-ը սկսած 140 դրամից, առանձին տեսակները՝ 150 դրամ: Վարչության պետը նշեց, որ մթերող կազմակերպություններն արտադրողին գումարները տրամադրել են նշված ժամկետներում՝ տասն օրվա ընթացքում:

Լիլիթ Մաճկալյան