Մատեո Ռենցին և Անգելա Մերկելը «թշնամիներ են». Il Giornale

Համաշխարհային Մամուլ 6 Հոկտեմբեր, 2014 23:38

Գերմանիայի կանցլեր Անգելա Մերկելի և Իտալիայի վարչապետ Մատեո Ռենցիի միջև հարաբերություններն ավելի ու ավելի են լարվում: Այդ մասին, ինչպես տեղեկացնում է «Արմենպրես»-ը, գրել է իտալական Il Giornale հրատարակությունը՝ նշելով, որ Ռենցին «մարտահրավեր է նետել գերմանական գերտերությանը»:

Չնայած Եվրամիության հետ կապված կանոնների և սահմանափակումների պահպանման վերաբերյալ Իտալիայի վարչապետի հայտարարություններին, Ռենցին կատարել է իր ընտրությունը՝ միանալով Ֆրանսիայի կառավարության գործող ղեկավար Մանուել Վալսին, որն անցյալ հինգշաբթի օրը հանդես է եկել Եվրամիությունում կիրառվող խիստ խնայողության քաղաքականության դեմ: Վալսը հայտարարել է, որ Ֆրանսիան կկարողանա Եվրամիության առաջադրած նպատակին՝ համախառն ներքին արդյունքի 3 տոկոսին, հասնել սոսկ 2017 թվականին խստագույն խնայողության միջոցով, և այդ մասին նրա հուզումնալից արտահայտություններն անմիջականորեն ուղղված են եղել Գերմանիայի կանցլերին, գրել է հրատարակությունը:

Նաև հենց Մերկելին է վերաբերել Ռենցիի՝ վերջերս արած արտահայտությունն այն մասին, թե ոչ ոք իրավունք չունի մյուս երկրներին վերաբերել որպես դպրոցականների, Եվրոպան ուսուցիչների և աշակերտների վայրը չէ»: Հայտարարությունն արվել է այն բանից հետո, երբ Գերմանիայի կանցլերը Եվրամիության երկրներին կոչ է արել «կատարել իրենց տնային աշխատանքը»՝ նկատի ունենալով եվրոգոտու տնտեսական պլանի կատարումը: Իտալիայի վարչապետը Մերկելի այս արտահայտությունից օգտվել է, որպեսզի ամրապնդի Ֆրանսիայի հետ դաշինքը, որն իր «տնային աշխատանքը» չի կատարի առնվազն մինչև 2017 թվականը, և «մարտահրավեր է նետել» Գերմանիային, նշել է հրատարակությունը:

«Ես Օլանդի հետ եմ: Եթե Ֆրանսիան որոշել է հետաձգել ՀՆԱ-ի 3 տոկոսին հասնելը, նշանակում է, դրա համար կան իրենց պատճառները»,- մեջբերում է Il Giornale-ն Ռենցիի խոսքը: Երկու ղեկավարների միջև լուրջ տարաձայնությունների մասին է վկայում Իտալիայի որոշ անգվածային լրատվամիջոցների տեղեկատվությունն այն մասին, որ Միլանում կայանալիք գագաթնաժողովում Մերկելը և Ռենցին կանցկացնեն երկու առանձին մամուլի ասուլնիսներ, ինչը կարելի է գնահատել որպես իտալացի պաշտոնակցի հետ հանդիպելուց խուսափելու Գերմանիայի կանցլերի փորձ, հաղորդել է ՌԻԱ Նովոստին: