Հայաստանում սննդամթերքի արտադրությունն աճել է

Հայաստանում սննդամթերքի արտադրության ծավալները զգալիորեն ավելացել են: 2014 թվականի առաջին ութ ամիսներին ավելի քան կրկնակի աճ է գրանցել կենդանական յուղի արտադրությունը' նախորդ տարվա 360.4 տոննայի փոխարեն կազմելով 781.5 տոննա: «Արմենպրես»-ի հաղորդմամբ' այս տարի 53.3 տոկոսով ավելացել է պաղպաղակի արտադրությունը և կազմել 6 մլն 34.4 հազար լիտր: Ալյուրի արտադրությունն ավելացել է 45.2 տոկոսով' կազմելով 134.6 հազար տոննա, մակարոնեղենի արտադրությունը' 21 տոկոսով' կազմելով շուրջ 3 հազար տոննա:

ՀՀ ազգային վիճակագրական ծառայության հրապարակած տվյալների համաձայն' շաքարավազի արտադրությունն ավելացել է 37 տոկոսով և կազմել 44 հազար 928 տոննա: Առավել փոքր աճ է գրանցել մսեղենի և կաթնամթերքի արտադրությունը: Հունվար-օգոստոս ամիսներին Հայաստանում արտադրվել է 27 հազար 105.4 տոննա միս, որը նախորդ տարվա համեմատ ավելի է 12.6 տոկոսով, իսկ կաթի արտադրությունն ավելացել է 5.7 տոկոսով' կազմելով 299.1 մլն լիտր:

2014 թվականի առաջին ութ ամիսներին նվազել են թթվասերի, կաթնաշոռի և հացի արտադրության ծավալները: Թթվասերի արտադրությունը կրճատվել է 19.8 տոկոսով' կազմելով շուրջ 2 տոննա, կաթնաշոռի արտադրությունը' 7.6 տոկոսով' կազմելով 600.3 տոննա: Հացի արտադրության ծավալները հունվար-օգոստոսին կրճատվել են 2.4 տոկոսով և կազմել 195 հազար տոննա: