Իսլամիստները հայտարարել են Ադրբեջանից զինվոր հավաքագրելու մասին. «Ազադլըգ»

Իրաքի և Սիրիայի զավթած տարածքներում «Իսլամական պետություն» հռչակած «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման ղեկավարությունը հերթական անգամ հայտարարել է իր շարքերը լրացնելու համար Ադրբեջանից ևս զինվորներ հավաքագրելու մասին: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը:

ԻԼԻՊ-ի «Ջիհադ ալ Շամ» կոչված հոդվածում ասվում է, որ եթե «Իսլամական պետության» վրա ԱՄՆ-ի գլխավորությամբ հարձակվի անգամ ամբողջ աշխարհը, չի կարող հաջողություն ունենալ, քանի որ «Ալլահին սիրողներն են» իրենց կողմնակիցները:

«Եթե ԱՄՆ-ը կարծում է, թե կոալիցիա ստեղծելով' կարող է վերացնել «Իսլամական պետությունը», սխալվում է: «Իսլամական պետությունը» Ալլահի թույլտվությամբ մեծանում, ընդարձակվում է ամեն անցնող օր: Մեր եղբայրներն այլևս ոչնչի չեն սպասում և ուղղվում են դեպի Ալլահի կանոնների հանգրվանած այս հողեր: Ուզբեկստանից, Ղազախստանից, ամբողջ Կենտրոնական Ասիայից մինչև Չինաստանի սահմաններ, Եվրոպայից մինչև Կովկաս և Ադրբեջան մեր եղբայրներն ուղղվում են «Իսլամական պետություն»,- ասվում է հոդվածում: Հեղինակը բացահայտել է նաև այն երկրների անունները, որտեղից վերջին զորքերը միացել են ԻԼԻՊ-ին: Դրանք Ուզբեկստանն ու Ադրբեջանն են:

Որոշ ժամանակ առաջ Իրանի IRNA լրատվական գործակալությունը ևս հայտնել էր ԻԼԻՊ-ի' Ադրբեջանից զինվորներ հավաքագրելու մասին: Գործակալության համաձայն' ԻԼԻՊ-ի ցուցակում Ադրբեջանը զբաղեցնում է հիմնական տեղերից մեկը:

«Ադրբեջանում ԻԼԻՊ-ի իրական վտանգի առկայությունը խոստովանում են նաև պաշտոնական կառույցները: Ադրբեջանի կրոնական կառույցների գծով պետական կոմիտեի ղեկավար Մուբարիզ Գուրբանլըն օրերս ԶԼՄ-ներին հայտնել էր, որ իրենք ունեն Ադրբեջանում ԻԼԻՊ-ի հետ կապեր ունեցող անձանց ցուցակը: Այս փաստը ցույց է տալիս, որ Ադրբեջանում ԻԼԻՊ-ի սպառնալիքը բարձր մակարդակի վրա է: Ադրբեջանում ԻԼԻՊ-ի նման ահաբեկչական կազմակերպության կողմնակիցներ հավաքագրելն անկասկած վտանգավոր փաստ է»,-նշում է «Ազադլըգը»: